El pasáu domingu 29 de xunu celebróse la última final del XIII Concursu de Canción Asturiana Conceyu de Siero, ún de los eventos institucionales más veteranos dedicaos a l’asturianada. Yá hai ganadores y esti domingu 13 de xunetu a les once y media la mañana van xuntase nel Teatru Auditoriu de La Pola pa recibir los gallardones y facer una actuación última nel marcu d’esti certame.
Los y les vencedores d’esta edición son Lorena Corripio López (categoría absoluta femenina), Isaac Sierra Longo (categoría absoluta masculina), María Luisa Martínez Suárez (modalidá canción vaqueira Memorial Graciano Gutiérrez – Radio Pola), Carlos Velasco Montes (modalidá canción ayerana) y Cristina Sánchez Sánchez y Manuel Roza Llera (campeones canción dialogada Memorial Agustín Argüelles y Diamantina Rodríguez).
Tamién van actuar nesta final una representación de la categoría moza formada por Bárbara Riesco Gómez, Jairo Pérez García y Marina Carbajosa González. Amás, Anabel Santiago va facer el pieslle musical nesta xornada que tien a Valentín Fuente como gaiteru oficial y que ta presentada por Esther Fonseca y Miguel Ánxel Montenegro.
El Concursu de Canción Asturiana Conceyu de Siero ye un certame entamáu pol Ayuntamientu Siero, la so Fundación Municipal de Cultura y AFATRA (Asociación de Folclore Amigos de la Tradición). Lleva faciéndose trece ediciones y ye ún de los concursos que puntúa pal Premiu Obdulia Álvarez La Busdonga d’Asturianada.
Suscríbite a les nuestres novedaes
