Xaime Arias Trío asoleya ‘La mio neña’, discu qu’amesta jazz y asturianada

Yá ta a la venta na tienda online y en toles plataformes dixitales, La mio neña, el tercer trabayu del proyectu jazz Xaime Arias Trío. El pernomáu pianista regresa con un álbum formáu por ocho pieces que’amesten jazz, folclor, asturianada y improvisación, dando forma una referencia qu’amplía la discografía existente d’un movimientu musical calificáu como jazz de raigañu.

«Son temes del folclor asturianu que provienen mayoritariamente de l’asturianada. Tanto la estética como la forma respuendi más a la música improvisao qu’al folk, anque en mou dalgún pretendi ser una conversión del folclor a ritmos que-y seyan ayenos a la so natura», desplica’l pianista que comparte formación con Oscar Santos (baxu) y Eva Toca (batería). Xuntos, reinterpreten esta tradición «dientro de la llibertá creativa» que-y presta al tríu a traviés d’un cantar que tien la collaboración de la cantadora Sandra Álvarez y d’otros siete cortes instrumentales.

Xaime Arias ye ún de los pianistes más reputaos del país y lleva bien d’años venceyáu a la tonada: compositor, intérprete acompañando al pianu a montonera cantaores, pianista oficial del concursu Cuenca del Caudal, xuráu en dellos concursos de canción asturiana… Por eso califica a esti discu como «cuasi una obligación». «Tenía la necesidá de facer dalgo con esti repertoriu que, anque preciosu, pasa desapercibíu a una gran parte d’asturianos pol desconocimientu que se tien de la tonada fuera del públicu que se caltién fiel». D’esta manera va un pasu más allá na so discografía y, si bien nos dos anteriores trabayos del tríu «tócase’l folclor d’una manera marxinal, nesti hai un propósitu de convertilu en verdaderu protagonista del mesmu».

El jazz de raigañu

Isaac Turienzo, Eladio Díaz, Mapi Quintana, Lafu, Slum Suit… son dalgunos de los nomes que dan forma a la escena de jazz de raigañu o jazz del llar -como la califica una cuenta d’Instagram especializada nesti son-. Precisamente, los músicos de Xaime Arias Trío formen parte tamién de Slum Suit, qu’esti añu asoleyaron La casa vieya. Arias ye optimista nesti sen: «Nun creo que se puea dicir que la salú del jazz de raiz tea mal n’Asturies si entendemos que ye un país pequeñu». El pianista camienta que’l trabayu que se ta dando alrodiu esta escena «ye un reflexu de lo vixente de la música folclórica nel pensamientu y obra de los músicos d’anguaño, non solo nel jazz, sinón en munchos de los distintos y estremaos estilos que conviven nel presente». Él y la so banda gracies a La mio neña faen una nueva aportación al xéneru y a la música’l país.

Merca La mio neña na tienda online

Dexa un comentariu

X