Villaviciosa premia a Rodrigo Cuevas y Delfín Valdés y Cabranes a Chus Pedro

Esti sábadu 17 d’avientu tres persones clave de tres xeneraciones distintes van ser premiaes pola so aportación a la cultura asturiana. La Banda Gaites Villaviciosa-El Gaitero va entregar los sos premios anuales, dientro del Festival de Navidá de la so Escuela de Música Tradicional , a Rodrigo Cuevas y Delfín Valdés (vocalista de La Tarrancha y K-Nalón). Per otru llau, nel Ayuntamientu de Cabranes va entregase tamién esti sábadu’l premiu Joaquín Lloris de Cultura Asturiana a Chus Pedro Suárez, cofundador de Nuberu.

La banda gaites Villaviciosa-El Gaitero cellebra’l sábadu’l Festival de Navidá de la so Escuela de Música Tradicional, un eventu con bastante trayectoria nel que participa l’alumnáu faciendo una demostración de lo que deprendieron a lo llargo l’añu nes especialidaes de gaita, tambor, flauta travesera de maera, pandereta y baille. Coincidiendo col eventu, van facer entrega de dos galardones por parte de la propia banda, como ye costume: ún d’ellos pa delles persones entidaes o asociaciones que mostraren un apoyu notable a la banda a lo llargo del añu, y ésti va ser al cantante del grupu ska-fusión La Tarrancha y de hiphop K-Nalón, Delfín Valdés (L’Entregu, 1975), y otru a Rodrigo Cuevas (Uviéu, 1985), pol so llabor na defensa y divulgación de la cultura asturiana. La cita va ser nel Teatru Riera de Villaviciosa, a les 19:30, con entrada llibre.

Per otru llau, el Grupu Ensinlluz de Cabranes reconoz a Chus Pedro (L’Entregu, 1955) col premiu Joaquín Lloris pola so trayectoria de más de 40 años en defensa de la música y la cultura asturiana, y la so aportación a la mesma a traviés de la so discografía. L’actu d’entrega va ser a les 19.30h del sábadu nel salón d’actos del Ayuntamientu de Cabranes y n’él van actuar Pelayo y Llara Rubio a la gaita y el tambor; los cantaores de tonada José Tronco y Rubén Barredo: y el monologuista Manuel García Miranda. Tamién collabora’l músicu Rodrigo Joglar.

Mercar discos de los premiaos