El músicu y poeta Miguel R. Monteavaro asoleyó’l llibru A Lluz, Orión e a Nova Lluz, una obra que naz del espectáculu del mesmu nome que comparte col so hermanu Andrés Rodríguez Monteavaro y qu’axunta poesía en gallego-asturianu, música y imaxe. Trátase d’una revisión del mitu clásicu d’Orión con elementos contemporáneos y esperimentales. Los exemplares editaos por Disbauxa yá puen mercase na tienda online de musicasturiana.com.
«A Lluz, Orión e a Nova Lluz ye’l proyectu de poesía, música y visuales que planteamos Andrés y yo pa finales de 2022 y sobre too 2023», comentó a Musicasturiana.com l’añu pasáu Miguel Rodríguez Monteavaro, responsable de la parte lliteraria de la obra. «Ye un proyectu en tres fases. La primera ye la lliteraria, que revisita’l mitu d’Orión, que ye un xigante clásicu griegu y tamién ye mio fíu; entós xuego coles dos coses y xuego como si Orión fuera’l prototipu d’home periféricu del sieglu XXI. Dempués tien la parte musical que ye sobre too gaita y música tradicional descompuesta y secuenciada electrónicamente, que lo fai Andrés», desplica’l músicu y escritor. Per último ta la parte audiovisual, desendolcada por Iván Torres y que se pudo ver nel Teatru de La Llaboral per primer vez en marzu de 2023.
A Lluz, Orión e a Nova Lluz nació gracies a la beca Asturies, ayuda de la Conseyería de Cultura, Política Llingüística y Turismu que sofita los gastos durante un mes pa desendolcar una residencia de creación lliteraria en llingua asturiana o n’eonaviegu na Residencia Literaria 1863 d’A Coruña, allugada nel llugar onde naciera la Real Academia Galega y a pocos pasos d’onde tamién vivieron Emilia Pardo Bazán, Rosalía de Castro o Pablo R. Picasso. Miguel Rodríguez Monteavaro ganó la primer convocatoria d’esta ayuda gracies, ente otres coses, al calter interdisciplinar d’esti proyectu. Pa rematar la so puesta n’escena, el proyecu tamién tuvo una Residencia del Programa d’Artes Escéniques del Centru de Recursos Escénicos del Principáu d’Asturies.
Suscríbite a les nuestres novedaes
