Dende esta selmana yá ta disponible en plataformes musicales el compilatoriu Xentiquina, editáu pol sellu Fono Astur en 1997 con una escoyeta de más d’una trentena de cantares de los sos anteriores discos: Xentiquina, cancios pa neños (1988), Yera la princesa d’un país (1990) y Llambionaes (1994). Esti trabayu pue tamién mercase na tienda de musicasturiana.com. Cola dixitalización d’esti trabayu, historia de la música n’asturianu fecha por y pa la reciella, siguimos avanzando nel envís de faer más accesible la música’l país per tol mundu.
Xentiquina ye una de les formaciones musicales más importantes pa la llingua asturiana, yá que foi l’únicu grupu formáu esclusivamente por neños y neñes y, per 25 años, foi la única formación que facía cantares n’asturianu pa la reciella. La so historia ye inseparable de la del mayestru Nacho Fonseca, que nel cursu 1986-1987, cuando daba clases en Porrúa, decidió facer un grupu musical con dellos de los sos escolinos. Llamáronse Seliquín y llegaron a grabar un discu. Col treslláu de Fonseca a dar clases a Lieres, reconvirtió’l proyectu en Xentiquina. Foi una revolución pa la música n’asturianu, una ferramienta imprescindible pal enseñu de la nuestra llingua y tou un éxitu; asoleyaron seis discos, dieron un centenar de conciertos per escueles y escenarios del país, y involucraron a cientos de neños y neñes na normalización del asturianu.
Suscríbite a les nuestres novedaes
