Los Premios AMAS de la Música Asturiana abrieron oficialmente’l procesu de votaciones populares, que cada añu miden el pulsu de la escena musical del país y la implicación del públicu colos sos artistes y proyectos favoritos.
Al traviés de la web oficial de los AMAS, el públicu puede votar nes distintes categories y participar activamente na elección de los ganadores d’una edición que vuelve amosar la diversidá estilística de la música fecha n’Asturies, dende’l folk y la tradición hasta’l rock, el pop, la electrónica o les propuestes más alternatives. Nesi sen, son dellos los nomes venceyaos a la musica n’asturianu los qu’apaecen nes nominaciones anunciaes de les 22 estayes que conformen estos premios.
Leticia Baselgas panderetera y vocalista de L-R, ye la representación de la música n’asturianu na estaya de voz, mientres que Vero Rubio ye la persona nominada na categoría d’otros instrumentos pola so habilidá cola trompeta xunto con Gonzalo Llao, bouzukista en Deira. Na estaya de la gaita, les bandes nominaes son la Banda Gaites Saxum, Banda Gaites Villa de Mieres, Banda de Gaitas «El Penedón» de Castropol y Banda Gaitas Conceyu Grau. Gonzalo Pumares, componente de Cerezal y Vérsica apaez nomináu tamién poles sos lletres.
En producción, los cuatro nominaos apaecen na música n’asturianu: Luis Núñez tien dellos cantares n’asturianu y el premiu Camaretá al Meyor Cantar, Sergio Firu produxo pa infinidá de grupos asturianos, mesmo que Zeros, mientres qu’Álvaro Bárcena collaboró nel discu Camín de Fierro de la Banda Gaites Camín de Fierro.
Los nominaos al cantar folk nesta edición son Entós, con ‘Barro’, y que van tocar nel próximu Semando Fest; ‘El rescamplíu’ d’Alienda; ‘Cenicientes del Carbón’, de Marisa Valle Roso; y ‘L.lixeros’, single del futuru primer discu d’Abéu. D’otra banda, los artistes nominaos a discu folk son los d’Héctor Braga con Rabil; Banda Gaites Llacín, con Resollu; Rubén Bada, col so primer discu homónimu; y Guieldu, con Memories de Deva. Na estaya de discu rock, apaez Skama la Rede, col so discu sacáu recién, nel que celebren los 20 años de trayectoria, mesmo que Lïbre, con dos cantares n’asturianu nel so primer discu.
A lo último, la banda moza La Ciudá nel Mar apaez nominada na estaya de grupu revelación. Son, en total, 23 nominaciones a artistes o persones venceyaes a la música n’asturianu y presencia en 9 de les 22 estayes, un datu que fala bien del rumbuy espoxigue que ta teniendo nesta dómina. La presente edición va zarrase cola gala de entrega de premios, prevista pal 13 de marzu a les 19:30 hores nel Teatru Filarmónica d’Uviéu, una cita que va poner el ramu a selmanes de votaciones y participación del públicu.
Suscríbite a les nuestres novedaes
