A finales de 2022 A Mansalva publicó’l Diccionariu Berrón, un llibru de 101 fueyes que puercuerre los principales términos y espresiones que’l míticu grupu de rock rural, Los Berrones, lleva usando más de 35 años. Términos como «Fechu una llaceria», «Esbraguetáu», «Molleyá» o «Ramal» vienen acompañaos d’una desplicación fecha col estilu desenfadáu que caracteriza a los de Tolivia. La obra -que yá se pue mercar en musicasturiana.com- ta arriquecida amás poles ilustraciones de Neto García del Castillo y testos de David Villa, Aitana Castaño, Alex Galán, Marisa Valle Roso, Pablo Texón, David Castañón y Montse Tomé.
«Pallabres o espresiones escuchaes una y mil veces de boca de los paisanos suenen siempre a verdá, tantu pal que les diz como pa los que les escuchen y yá dende los anicios, muncha xente entamó a calificales como “auténtiques”. Claro que, pa otra xente, yeren frases indescifrables d’un idioma raru y hasta inventáu (¿por nosotros, quiciás?)», comenta’l grupu nel resume del llibru, reconociendo tamién que «pasaes más de tres décades, igual ye hora d’axuntar nesti llibrín munches de les pallabres y espresiones qu’apaecen nes canciones de Los Berrones».
Na introducción del llibru escláriase que «nun se trata de facer un diccionariu completu nin rigurosu sinón más bien d’aclariar el significáu d’una riestra llarga de términos que pue ser qu’interesen a daquién» y que «munches pallabres apaecen na forma dialectal propia de Llaviana y, concretamente, de Tolivia». «Lo principal ye indicar el significáu que la pallabra o espresión tien nuna canción concreta, faciéndolo d’una manera munches veces coloquial y teniendo en cuenta que tamién se xuega colos dobles sentíos. Y amás, na mayoría de los casos axúntase un comentariu en plan de chancia que sirva de contestu pa meyorar la comprensión», apunta’l testu presentación d’una obra mui amañosa tanto pa siguidores de Los Berrones como pa la xente interesao na llingua asturiana y na so riqueza léxica.
Suscríbite a les nuestres novedaes
