San Félix anuncia un espectáculu nuevu, llanza crowfunding y entama un taller de facer panderetes

El Grupu de Baille Tradicional San Félix de Candás continúa les actividaes pa festexar 40 años de trayectoria. Esti sábadu 2 y domingu 3 entamen l’últimu de los talleres que vienen faciendo a lo llargo del añu. Va tar dedicáu a construyir una pandereta propia y va impartilu l’artesanu Xosé Maceda. Per otru llau, l’agrupación folclórica anuncia l’espectáculu Llamando a Conceyu, col que quieren «dar un pasu alantre na renovación de la conxunción música y baille tradicional pa llegar a les nueves xeneraciones». La propuesta va interpretase’l 17 d’avientu na cai y pa financiar la so execución piden 1.000 euros a traviés d’una campaña de crowdfunding.

«Llamando a Conceyu ye un espectáculu de cai qu’axunta música y baille, pero tamién palabres. Una palabra actual y averada a la historia, la cultura y la realidá d’esti llugar», comenten dende’l grupu de baille. La música ta creada por Javier Tejedor y ye «de dellos estilos» pero con raigañu tradicional; el baille ta «más averáu a la tradición, pero intentando amosar muncho más»; y la palabra, pronunciada por Raquel Prendes, «fala de los conceyos abiertos, que tuvieron un papel cimeru na organización social de los pueblos, y qu’entá se caltienen en dellos llugares d’Asturies». D’ehí vien el propiu nome del espectáculu.

Porque Llamando a Conceyu «naz de la sociedá pa la sociedá, y por eso va facese na cai y de baldre», despliquen dende San Félix. Como nun tienen nengún sofitu institucional, piden un gabitu a traviés d’un crowdfunding en Verkami col qu’algamar los 1.000 euros necesarios pa cubrir dalgunes xeres como les de «estudiu de grabación, producción y soníu». D’esta manera, tres l’éxitu del so anterior Palabres -Premiu de la Crítica RTPA al Meyor Espectáculu de 2013-, el veteranu grupu de baille sigue apostando pola creación; nesti casu «por un nuevu conceptu de pasucáis que, acompañáu de la palabra, avéralu al teatru de cai». Nél, nun va faltar tampoco la perspectiva social, yá que van tar presentes cuestiones como «la situación de les muyeres d’antaño y el camín que percorrieron pa llegar hasta l’actualidá» o «la sostenibilidá mediuambiental venceyada cola mar».

«Fai la to pandereta»

Amás de la interpretación de Llamando a Conceyu -domingu 17 d’avientu a les 13h en Candás-, San Félix echa la traca final del so 40 aniversariu entamando l’últimu de los talleres que programó en 2023. Esti sábadu 2 -con dos turnos yá completos: de 10h a 14:30h y de 16h a 20:30h- y el domigu 3 de 10h a 14:30h; ufre un taller de facer panderetes na Plaza La Baragaña impartíu por Xosé Maceda. L’actividá tien un preciu de 80 euros y inclúi tolos materiales pa marchar pa casa cola pandereta al acabar el taller.

Mira un videu promocional del espectáculu

Dexa un comentariu

X