En xunetu de 2023 salió a la cai Soul Dream, el primer trabayu del gaiteru Pablo Bango. L’EP ta formáu por seis pieces qu’entemecen estilos como’l folk, el rock, el hip hop, la música celta y la new age. Too ello cola gaita como puntu d’alcuentru. Agora incorpórase al catálogu de la tienda online de musicasturiana.com y yá pue mercase dende cualquier llugar del mundu por 12 €.
Bango ye’l nome artísticu de Pablo Bango, gaiteru tituláu nel Conservatoriu Profesional de Música de Xixón na especialidá de gaita. La innovación ye la pallabra qu’acompaña a so propuesta, caracterizada por amestar esti instrumentu tradicional y la flauta a otres sonoridaes y instrumentos como los pianos, sintetizadores, voces y percusiones tribales.
En 2021 llanzó’l so primer single, ‘Raíces‘, col qu’algamó una nominación a los Premios AMAS. Tuvo otra tamién col cenciellu ‘Soul Dream‘ (2022), pieza que da nome al so discu debut, Soul Dream. Esti presentóse nel Festival Intercélticu d’Occidente y cunta coles collaboraciones de la cantante malagueña Klaudya; de Javier Blanco -prestixosu arreglista y productor sinfónicu que tien trabayao con nomes como la Sinfónica de Viena, Mägo de Oz o Sôber-; de los guitarristes Moisés Suárez y Chema Iglesias; de Mario Rodríguez al acurdión; del percusionista Marcos Bango; d’Héctor Braga y de la Orquesta de Cámara de Siero (OCAS). Na canal de YouTube de Bango pueden vese varios videoclips de los temes y agora yá se pue mercar esti orixinal discu en musicasturiana.com.
Suscríbite a les nuestres novedaes
