Yá ta a la venta l’EP d’Alfredo González ‘Asuntu de Fe’
Yá ta a la venta en musicasturiana.com y en toles plataformes dixitales Asuntu de Fe, l’octavu trabayu del cantautor turonés Alfredo González. Esti EP supón la publicación dempués d’once años d’un trabayu discográficu interpretáu únicamente n’asturianu per parte d’esti reconocíu músicu. El discu ta producíu por Sergio Rodríguez “Tutu” y ye un EP formáu por cuatro cantares intimistes al empar que contundentes, d’ente los que relluma’l single “Si te pregunten por mi“, que tien d’invitaos a Nacho Vegas y al Coru Mineru de Turón.
Alfredo González ye ún de los cantautores actuales más reconocíos de la escena asturiana. La so carrera entamó en 2001 y pasín a pasu foi faciendo camín con 6 discos nos que suena una canción d’autor influyía pol rock o l’indie. Ente la so discografía rescampla ‘La Nada y Tu’, del añu 2009, que ta n’asturianu dafechu y que ye’l más gallardonáu, con premios como’l Meyor Cantar en Llingua Asturiana o’l Premiu de la Crítica RTPA al Meyor Discu d’Autor. Tienen collaboráu con esti artista escritores de sonadía como Pablo Texón o músicos como’l reputáu Quique González, que llegó a cantar n’asturianu nun tema.
Esti 30 de setiembre de 2022 llanzó dos EP, ún en castellanu, La Insistencia, y el mentáu n’asturianu Asuntu de Fe. La última esperiencia d’Alfredo González cantando n’asturianu foi ‘Dobleces‘, doble CD que González firmó xunto col escritor Pablo Texón, anque pel mediu el músicu sí que trabayó na llingua autóctona componiendo p’artistes como Silvia Quesada, Muyeres, Alienda… llanzó’l cantar “Pentotal” nel so anterior discu ‘Afluentes’ y el cantar del IX Día de la Reciella “L’asturianu conéctate“.
