Esti fin de selmana cellébrase en Mieres una de les cites más destacaes pa tola xente amante de la cultura tradicional: l’Ochobre Folk. Esti eventu entamáu pol Grupu Folclóricu Prau Llerón y el Conceyu Mieres va axuntar del 7 al 9 d’ochobre charres, pasucais, conciertos, talleres, actividaes pa la reciella, baille y xinta y bebida’l país. Too ello nel Parque Xovellanos y con una mayoría d’actividaes gratuites.
La novena edición del Ochobre Folk arranca’l vienres a les 19h cola charra Vaqueiros d’Alzada impartida por Fe Santoveña y Fernando Rodríguez pa llueu dar pasu a la bandina Los Llerones que, dende les 20h a les 22h, va percorrer los chigres de la cai Ayer y animar l’ambiente echando unos cantares. Per último, la bandina Salón Bombé va actuar nel Parque Xovellanos a les once la nueche.
El sábadu 8 la cita entama dende bien temprano. De 10h a 13h Fernando Rodríguez va dar un taller de baille y castañuela vaqueira -con un preciu de 15 €- mientres que a les 13h va impartise un taller gratuitu de baille astur-gallegu. P’animar la hora’l vermú, la canción asturiana va restallar de 14h a 15h nel Parque Xovellanos coles actuaciones d’Alicia Villanueva, Carlos Velasco y Fran Pola. El baille protagoniza la tarde y la nueche gracies al desfile de grupos folclóricos peles cais de Mieres a les 17h, l’alcuentru folclóricu a les 18h con Prau Llerón, Ximiela Louro (Galicia) y la Banda Gaites La Laguna del Torollu (Uviéu). Llueu va haber una espicha por 15 € cola que garrar fuercia pa la Nueche en Danza na que van participar La Garrapiella, los gallegos Os Da Porfía, amás d’haber escenariu llibre pa quien quiera tocar. La Danza Prima y la chiculatada ponen el ramu a la xornada a les dos de la madrugada.
Actividaes pa la reciella
L’últimu día del festival les actividaes pa la reciella garren protagonismu. A les 12h va haber pintacares y xuegos tradicionales y a les 13h la cuentacuentos Andrea Lobo (tamién componente de La Tarrancha y FemFarria) va cuntar La Bruxa Lloba. La bandina popular Los Gascones van tocar nel Parque Xovellanos a les 13h.30h enantes de qu’esti eventu tan completu remate a les 14h col vermú del país y la venta’l bollu preñáu.
Suscríbite a les nuestres novedaes
