Va unes selmanes, Nuramay anunciaron el llanzamientu del so primer trabayu. Trátase d’una propuesta de «folk intimista, ensin demasiaes pretensiones, una muyer que canta y un paisanu que l’acompaña con instrumentos variaos», como diz Maxi Areñes, cabezaleru del proyectu xunto a la so compañera Maitetxu Isla. Agora’l so primer discu Cantares de tierra y mar yá pue mercase en Musicasturiana.com.
Sicasí, esti dúu ye abondo más. «Munchos romances de tola península, dalgún d’ellos sefardí, vieyos cantares en llingua catalana, y por supuesto, temes propios n’asturianu» dan forma a esti grupu. Nuramay surdió «en metá de les grabaciones de Maxi pal prósimu trabayu de Fontoria, nel que ta inmersu dende mayu», desplica la vocalista del proyectu. «Plantegóme la idega de facer algo xuntos muncho más tranquilino, más íntimo y lloñe del tipu de producción tan complexa que-y conlleva un discu de Fontoria» y asina ye como axuntaron «cantares tradicionales de diferentes xeografíes y temes propios» pa da-yos un aire nuevo.
Les lletres xueguen un papel importante d’ente toles pieces que puen sentise nel discu. D’esta manera, Maitetxu Isla destaca por ser «perespecial» ún que tien lletra del so bisgüelu, Ángel Ruiz y Pablo, «escritor menorquín mui reconocíu». Nél, Maxi «incluyó un cachín d’una grabación de fai más de 40 años» na que canta’l pá d’Isla. «Teniendo en cuenta que mio padre morrió teniendo yo 7 años, podéis imaxinavos lo máxico qu’esi tema ye pa min y cuánto me presta cantalo», añade la vocalista.
Suscríbite a les nuestres novedaes
