Ente’l sábadu y el domingu, los conceyos de Llanes, Mieres, Uviéu, Piloña y Teberga van acoyer seis eventos estremaos, dende charres y alderiques hasta espectáculos musicales pasando por un vermú de panderetes y la grabación d’un podcast sobre censura y resistencia. El fin de selmana entama coles aules del Alcuentru Trad-Urbán de la música de tresmisión oral asturiana y gallega d’anguaño. La edición d’esti añu celébrase en Porrúa, onde van tocar, amás, Pandeireteiras A Volta do Agro (Lugo), Flor d’Agua (Degaña) y Comando Curuxás.
Mentanto, el Conservatoriu Superior ‘Eduardo Martínez Torner’ acueye dende les 10.30h la I Xornada Les Enseñances de la Gaita n’Asturies sobre les perspectives didáctiques, históriques y presentes de los estudios reglaos del instrumentu. Nél van participar docentes, investigadores de la Universidá d’Uviéu, responsables de l’alministración pública y l’alumnáu de la especialidá nos conservatorios. Nel intre, el podcast Carne Cruda, dirixíu por Javier Crudo, aterriza nel Pozu Santa Bárbara de Mieres p’aldericar, dientro de la iniciativa Caja de Resistencia de la Conceyalía de Cultura, sobre la censura nel ámbitu artísticu con Xune Elipe y otres artistes asturianes.
La tarde del sábadu protagonícenla l’espectáculu de presentación del discu 286 llunes d’Herbamora en La Benéfica de Piloña dende les 19h, onde tamién va haber espicha cola DJ Killaphonia; y el conciertu d’Hevia nel Teatru Campoamor d’Uviéu a les 20h, que va cuntar con una bayura de collaboraciones de la escena asturiana como Marisa Valle Roso, Ramón Prada o Mariluz Cristóbal Caunedo. L’actuación de Soi Panderetera, les alumnes de la Escuela de Música Tradicional La Quintana, na Taberna Narciso de Teberga a la hora del vermú zarra l’axenda del fin de selmana.
Tola programación d’equí a los próximos meses pue vese na Axenda de Musicasturiana.com.
Suscríbite a les nuestres novedaes
