La investigación El floréu de gaita asturiana: Patrimonio, recuperación y uso fecha por Balbino Menéndez Suárez y Ricardo Soberado Hoyos, editada pol RIDEA, yá pue mercase na tienda online de musicasturiana.com. Trátase de la segunda publicación conxunta qu’estos dos maestros gaiteros asoleyen dempués del manual didácticu Iniciación a la gaita asturiana (2011). El llibru contién el primer estudiu monográficu sobre’l floréu de gaita que se fai n’Asturies, una de les manifestaciones idiomátiques del instrumentu más propies y identitaries del patrimoniu musical del país.
Esta publicación ta estructurada en tres partes: los testos musicales, l’estudiu y investigación, y la documentación. El pegoyu fundamental del trabayu foi la recopilación de centenares d’exemplos de floreos en delles fontes sonores, cola documentación que requier el procesu pa especificar los datos biográficos y discográficos asociaos a eses grabaciones. Inclúi les trescripciones de 239 floreos de 67 gaiteros -cuatro d’ellos anónimos-, y dos qr que dan accesu a les fontes sonores qu’emplegaron.
La parte del estudiu teóricu inclúi l’análisis de les grabaciones y trescripciones -con conclusiones sobre l’ámbitu melódicu, la tonalidá, el material temáticu, la métrica, l’agóxica y l’estilu de los floreos, ente otros elementos-; una definición y hipótesis sobre l’orixe, desarrollu y afirmación del fechu musical del floréu na gaita asturiana -y una teoría tamién sobre’l propiu términu-; y un trazáu de les perspectives futures nel tema. Agora, el resultáu d’estos últimos cuasique 6 años de trabayu de Balbino Menéndez y Ricardo Soberado yá ta disponible na tienda online.
Suscríbite a les nuestres novedaes
