Yá ta na cai l’Anuariu de la Música Asturiana 2021
Esti xueves entama a distribuyise y asoleya online la edición 2021 del Anuariu de la Música Asturiana, publicación editada por Goxe Producciones que lleva ventiún años faciendo un repasu fondu a lo que dio de sí’l recién pasáu añu en rellación a la música d’espresión asturiana. Como de costume les temátiques céntrense n’estilos como la música tradicional, el folk, el rock o la canción d’autor, con secciones qu’inclúin reportaxes, informes, entrevistes, crítiques, opinión, recoyida de material o anuncies. L’Anuariu ye de baldre, inclúi un CD compilatoriu y pue consiguise en ventiocho llocales repartíos en quince conceyos.
L’Editorial, nesta ocasión, titúlase «Política musical y financiación» y nél fálase de la necesidá d’una política musical acertada y permanente, amás de pidir la creación d’una Axencia de les Industries Culturales Asturianes que la lleve alantre. En cuantes a los conteníos, destaca’l reportaxe tituláu «Un añu d’Asturies, Cultura en Rede» (sobre’l circuitu qu’entamó la Conseyería de Cultura coles entidaes llocales), l’informe «Nuevu, vieyu y renováu rock n’asturianu» (onde se fala de la situación actual d’esta escena); la crónica sobre les I Xornaes del Vigulín Tradicional n’Asturies (desarrrollaes en Piloña), les entrevistes al cantante Fernando Valle Roso, Llevólu’l Sumiciu (dúu de folktrónica), Xune Elipe (ganador del XXVI Premiu ‘Máximo Fuertes Acevedo’) o Antón García (Director Xeneral de Política Llingüística); o l’artículu «El valor d’una guah.a quirosana», nel que’l cantante y músicu Héctor Braga fai una semblanza de Diamantina Rodríguez.
L’Anuariu zárrase, como siempre, cola sección Collecha, onde apaecen les producciones musicales del 2021. El volume compleméntase con un discu onde se recueyen muestres de lo meyor qu’ufiertó l’añu, con diecisiete cortes repartíos n’estilos como’l folk, el rock, la electrónica, o’l rap, con artistes y grupos como Baxel, Calea, Abéu, Luis Núñez, Avientu, Ochobre, Diañu Blues o la Banda de Gaites Camín de Fierro.
21 años d’Anuariu de la Música Asturiana
Dende Goxe Producciones, editora d’esti anuariu, rescamplen «l’esfuerciu que supón una publicación como ésta, gratuita y financiada esclusivamente con publicidá, con más de venti años de vida y una incidencia importante nel panorama musical asturianu». Amás, otru añu más la empresa fai un llamamientu nel so Editorial a puxar pola música autóctona: «Los poderes públicos del país han empezar a ser conscientes de la importancia y potencialidá del fechu musical asturianu, que xenera dinamismu y riqueza nel territoriu; tienen que dir más allá de les acciones puntuales o coyunturales y entamar una política musical con mayúscules. Ye’l momentu d’un plan global qu’incluya idees, voluntá de llevales alantre, persones al frente que conozan el sector y financiación amañosa. Un dotación económica que vaiga empobinada a onde realmente se necesita y pueda ser más productiva, que pueda facer llegar al sector onde por sí solu nun ye quien».
Puntos de distribución
AVILÉS: Cervecería Cabanón, El Cafetón
CANDÁS: La Rexa
DEGAÑA: La Guarida del Cunqueiru
L’ENTREGU: El Fielato Casa Carmina
L’INFIESTU: Cervecería La Traviesa
LLANGRÉU: L’Artesana, Matteria Creativa
MIERES: La Llocura, L’Abellugu
NAVA: La Naveta
NOREÑA: Copistería La Semeya
RIBESEYA: Chigre’l Corquiéu
SIERO: Taberna Cuévano, Abrelatas, El Caricós
UVIÉU: El Manglar, L’Esperteyu, La Raposa, Llibrería Trabe
VALDÉS: Camping Playa de Taurán
VILLAVICIOSA: Escuela de Música Tradicional Banda de Gaites Villaviciosa “El Gaitero”
XIXÓN: Café Trisquel, La Vida Alegre, La Revoltosa, Páramo Bar, Mundo Sonoro Discos, Paradiso
