«Xanzaina son once cantares con un marcáu acentu folk»
Dende’l pasáu 27 d’avientu ta a la venta y en toles plataformes dixitales ‘Xanzaina‘, el cuartu trabayu de Luis Núñez y Los Folganzanes. El músicu xixonés presenta esta obra como una compilación de «temes nuevos, versiones, nueves mestures y remasterizaciones», pero too ello «con un marcáu acentu folk, apurriendo notoriedá a les gaites, flautes y instrumentos de percusión, pero ensin perder el frescor de les guitarres llétriques tan carauterístiques del soníu del grupu».
El single escoyíu pa promocionar el trabayu “Los Cuatro Cuernos” -«una pieza instrumental na que’l soníu de la uilleann pipe treslládanos a les biesques irlandeses d’antañu», la versión de “A una Xanina”, tema orixinal del intérprete del Nuevu Canciu Astur Xulio Ramos, o la reinterpretación del “Chalaneru” -«con unes igües per interesantes y nel que la banda suena bien integrada, yá que toos participen a tope»-, son dalgunes de les pieces que Núñez destaca. El trabayu foi escoyíu amás pol xuráu de los Premios AMAS 2022 pa tar nomináu na estaya de Mejor Disco Folk.
Les lletres vuelven a tar toes n’asturianu, daqué característicu del nuevu proyectu musical del que fuera guitarrista del grupu pop-rock de los 90 Fuera de Serie, y nelles quixeron cuntar cola «collaboración de persones qu’apurrieron un plus al trabayu». Asina ye como Susana Sela, Inaciu Galán y Dani García de la Cuesta firmen los testos xunto a Luis Núñez.
Abondos proyectos
«Hai munches razones pa facer un discu, pero nesti casu la idega cimera yera enviar un mensaxe a la xente que mos sigue, pa que supiera que la banda caltiénse xunta y que la pandemia nun foi una torga pa siguir trabayando», comenta’l músicu sobre les razones p’asoleyar ‘Xanzaina’. Amás, destaca que nesti contestu ensin conciertos a cuenta l’andanciu tán «apostando poles grabaciones y vidios». Y asina ye, porque Luis Núñez y Los Folganzanes nun aparen. Tres llanzar en 2020 ‘Blinca’, agora ‘Xanzaina’, y asoleyar dellos singles en 2021 xunto a Susana Sela nuna iniciativa qu’axunta música y poesía, l’artista avanza que d’esti últimu proyectu «va tar el discu en toles plataformes en finando marzu y va ser una prestosada pa los oyíos».
