El Grupu Folclóricu y d’Investigación El Ventolín de Siero ta acabante d’anunciar nes sos redes sociales que «yá nun queda nada pa qu’arranque la XLV Selmana del Folclor Astur» y que pasín a pasu van dir publicando la programación d’estes destacaes xornaes dedicaes a la música tradicional. La primer anuncia ye la del estrenu en directo del tríu nuevu NosOtrestres, que va ser el vienres 10 d’abril a les 19.30h nel Teatru Auditoriu de La Pola y pal que yá tán a la venta les entraes por un preciu de cinco euros.
NosOtrestres ye una banda nueva de música tradicional pal baille formada por Laura Ruiz, Mónica Vega y Candela Pidal. Yá tienen el so primer trabayu grabáu, El son nos cantares de boda, un discu de diecisete cantares que ye un viaxe sonoru pela memoria colectiva de la cultura asturiana y lleonesa, onde la canción tradicional acompañaba los momentos clave de la boda y actuaba como un poderosu elementu de cohesión social.
A traviés de cantares tresmitíos oralmente de xeneración en xeneración, el discu pon en valor el patrimoniu musical y destaca’l papel protagonista de la muyer na sociedá tradicional, non namás como intérprete y tresmisora fundamental d’estos cantares, sinón tamién como exe vertebrador de la vida familiar y comunitaria. «Anque dientro d’un contestu patriarcal, les muyeres caltuvieron la continuidá cultural dende l’ámbitu domésticu y ritual, dexando una buelga decisiva na música, el baille y los testos qu’acompañaben la celebración nupcial», desplica’l testu presentación del discu.
Los cantares recoyíos nesti trabayu tán venceyaos a ritmos baillables como la muñeria, chanos o garruchas de boda. El panderu y la pandereta marquen el ritmu d’unes melodíes concebíes pa ser compartíes, cantaes y vivíes colectivamente, onde cada interpretación aportaba matices nuevos ensin perdar la so identidá.
Organizáu según los momentos del día de la boda —dende la llegada de les compañeras hasta’l banquete— y les persones protagonistes del ritual, esti discu ufre una visión global del acontecimientu nupcial como fechu social, musical y simbólicu. «El son nos cantares de boda nun ye namás una recopilación musical, sinón una celebración de la tradición oral, de la memoria popular y de les voces que, dende la cotidianidá, caltuvieron viva esta heriede», conclúi el testu presentación del trabayu.
Suscríbite a les nuestres novedaes
