Les fiestes d’El Bollu 2026 d’Avilés van incluyir na so programación dalgunes actuaciones venceyaes a la música asturiana, repartíes en distintos escenarios y formatos a lo llargo de los díes de celebración. Anque’l cartelu xeneral combina propuestes mui diverses, dende conciertos d’orquestes hasta actividaes populares, la presencia de propuestes del país vuelve tener el so espaciu dientro del programa oficial.
Ente elles, destaca la actuación de Daniel Meré, unu de los nomes más visibles de la nueva xeneración de gaiteros, que va presentar un repertoriu onde entemez la tradición cola música actual. El músicu, qu’algamó gran repercusión nos últimos años gracies a les redes sociales, va formar parte de la programación musical prevista n’El Parche, unu de los escenarios principales de les fiestes. Va ser el domingu, 5 d’abril, a les 20:00 hores.
Tamién ta prevista la presencia de la Orquesta Céltica Asturiana, una formación con llargu percorríu dientro del folk asturianu, que va ufiertar un conciertu centráu nel so repertoriu instrumental. La so participación supón la incorporación d’una propuesta consolidada dientro del panorama musical del país, con un soníu que combina elementos tradicionales con arreglos contemporáneos y que va poder esfrutase d’ella tamién el domingu, 5 d’abril, a les 21:00 hores, nel mesmu escenariu d’El Parche. Pela so parte, la Bandina de Gaites Urriellu va participar con un pasucais pel centru d’Avilés, aportando la sonoridá tradicional de la gaita a les cais mientres el desenvolvimientu de les celebraciones.
El restu de la programación del Bollo 2026 inclúi actos yá consolidaos como la comida na cai, los desfiles de carroces, el pregón o’l repartu del bollu y el vinu, amás de cites musicales d’otros estilos, verbenes, actuaciones de DJs y actividaes culturales como l’Alcuentru d’Habaneres o la feria d’artesanía. Un conxuntu d’actos que configura una programación amplia y variada pa tolos públicos.
Suscríbite a les nuestres novedaes
