Aporta un fin de selmana d’esos nos qu’hai qu’escoyer, bien cargáu d’eventos, col folk y la música tradicional de nuevO como protagonistes. Va tar difícil la elección:
L’axenda entama esti vienres 25 col conciertu de De Cotía n’Uviéu, a les 20.00h na Plaza Porlier. N’acabando, podemos averanos a The Burlesque Club pa esfrutar de La Ciudá nel Mar, a les 21:30. Dempués de sentiles, danos tiempu a llegar a Candás. La capital de Carreño acueye bona parte de los eventos d’esti fin de selmana: el vienres, a les 23.30h entama la XII Nueche Celta de Candás, col estrenu de la nueva formación de folk Matazúa, siguíos de Felpeyu y los gallegos Böj. Y yá dende’l xueves vien celebrándose’l XXVIII Festival de Bandes de Gaites Villa de Candás. Esti vienres van tener llugar dellos concursos de percusión y pareya de gaita y tambor, pasucáis y conciertos de bandes de gaites y la bagad Kerlenn Pondi. El sábadu sigui la programación con más pasucáis, conciertos y les actuaciones de Los Gascones y Orquestina La Xarangana, a la 01:30h, na Plaza Les Candases.
Tovía nun pasamos al sábadu, porque n’Avilés sigui avanzando la programación del Festival Intercélticu d’Avilés, con pasucáis, amuesa d’arte, delles actuaciones y desfiles y l’espectáculu «Lluna Celta». Y tirando pal oriente d’Asturies, arranca en Piloña Una Señora Fiesta, en La Meredal, entamando col Filandón, onde va tener llugar un Alcuentru de narración oral de baldre. El sábadu 26 va ser la segunda xornada, nomada Aires!. A les 12.00 podremos esfrutar de los Titiriteros de Binéfar, y a les 21.00h van entamar los conciertos de Ferla Megía, Cocanha y Gregotechno. Pal domingu 27, va cellebrase la Romería, en La Bilortera (Vegarrionda), dende les 12.00h, na que s’entamará una folixa ensin amplificación, con instrumentos acústicos que lleve’l públicu.
Pero’l sábadu ya arrancó enantes de los yá mentaos eventos, porque a les 11:30 Caparines van tar dando un conciertu na Plaza’l Carbayu, n’Avilés, y a la 13.30h, La Ciudá nel Mar van facer otru nel Café Lord byron, tamién n’Avilés, y pela nueche, destaca nel Festival Intercélticu d’Avilés el conciertu d’Altan, a les 22.00h na Plaza de Pedro Menéndez. Pa los que tean más cerca de Xixón, a les 13.30h va haber sesión vermú nes Fiestes de Ciares con Rollu Folk. Ellí mesmo, van tocar la bandina Los Muíles a les 19.00h, y pela nueche, dende les 20.00h, tendremos a 6 Riales, Mediarea y La Tarrancha. Por si nun fuera yá difícil escoyer, vamos tener a La Bonturné a les 20.00h nel Centru Cultural de Morea, n’Ayer, y pal occidente, a Joaquín Pixán en Tapia, a les 20.00h nel auditoriu de la Casa de la Cultura, quien al día siguiente, domingu 27, tamién va dar un conciertu en Sotu’l Barcu, a les 20.00h nel Teatru Clarín.
Volvemos pal occidente’l domingu pela mañana, pa zarrar el fin de selmana sintiendo a la bandina La Garrapiella en Samartín d’Ozcos, a les 12.00h, y tornamos llueu pa la zona centru, a la Nueche Celta de Granda, onde van tar tocando y actuando na carbayera’l Grupu Folklóricu Trebeyu, Pandereteros d’Anguañu, Herbamora y Beeswing (grupu residente del Pub O’Donoghue’s, n’Irlanda), a partir de les 21h. Amás, va haber un taller de baille tradicional a les 19.00.
Tola programación detallada d’equí a los próximos meses pue vese na Axenda de Musicasturiana.com.
Suscríbite a les nuestres novedaes
