Yá se conocen los nomes de los artistes nominaos a la edición 2022 de los Premios AMAS y yá ta abiertu’l plazu de votación a les distintes candidatures. Hai un total de ventiún categoríes de les que n’once hai presencia d’artistes rellacionaos cola música n’asturianu y/o de raigañu. Amás, de les 84 nominaciones totales, ventidós son p’artistes que participen d’escena.
Como cada añu, les estayes nes que más nominaciones hai pa la música d’espresión asturiana son les venceyaes a la música folk. Nesti sen, esti añu tán nominaos a Mejor Disco Folk los grupos L-R con ‘N.O.S.’, la Orquesta Céltica Asturiana con ‘Músicas del Arco Atlántico‘ -anque nesti discu nun hai nengún cantar de raigañu asturianu-, Luis Núñez y Los Folganzanes con ‘Xanzaina‘ y Baxel con ‘El Cantar del Simpatías’. Na estaya de Mejor Canción Folk los escoyíos pol xuráu son la Banda Gaites Camín de Fierro con «Flacos y Ensin Peinar«, Abéu con «Dame Tira«, Llevólu’l Sumiciu con «L.lamentu» y Fernando Valle Roso y Silvia Moreno con «Tengo un Vieyu en Casa«. Na estaya de Gaita, tán les bandes de gaites de Ribeseya, Xácara (Uviéu), El Trasno (Cuaña) y Güestia (L.lena).
En cuantes a instrumentistes, tán nominaos Susana Gudin de Taranus na categoría de Voz; Eva Díaz Toca y Xaime Arias (de Slum Suit y otros proyectos de jazz de raigañu) nes estayes de Batería y Teclaos; y los lletristes Ruma Barbero de Felpeyu y otres bandes, amás d’Alicia Álvarez y Toli Morilla qu’amesten lletres n’asturianu con otres en castellanu.
Nueves estayes
La llista complétase con dalgunes categoríes nes que nun suel haber presencia de la música na llingua autóctona o de raigañu. Ente les candidatures de Canción de Música Urbana tán nominaos A Fesoria & Imanol Núñez con «Soi de Mieres«; Calea ye ún de candidatos a Artista Revelación; en Músicas de Cine foi escoyida la BSO de Fruela 757 pal curtiu-documental de Puru Remangu ‘Emburriando‘; mentes que’l videoclip de Bango «Raíces» fechu por Néstor Fernández ye parte de les nominaciones a Videoclip. Les votaciones puen facese na web de los Premios AMAS hasta’l 13 de febreru.
Suscríbite a les nuestres novedaes
