Música y política en Bretaña

Probablemente Bretaña seya’l país celta más paecíu a Asturies depués de Galicia, la influyencia de la música contemporánea bretona foi fundamental nel procesu qu’esperimentó l’asturiana a mediaos de los años 70 y ye clave pa entender el surdimientu del folk patriu. Esa pequeña y verde península atlántica tien ún de los sistemes musicales europeos más potente y variáu, en constante evolución y renovación, frutu d’una historia fonda na que la cuestión ideolóxica ye una de les sos bases. La renovación y actualización de la música bretona tuvo, dende’l primer momentu, un componente políticu mui claru y respondía a la necesidá d’adaptación a un mundu en procesu de cambiu. 

Historia política

Si l’universu sonoru bretón amuesa una bayura envidiable, el sistema socio-políticu cuenta tamién con una tradición allargada nel tiempu y bien dinámica na actualidá. Los primeros intentos d’articular un movimientu nacional bretón danse -como en munches otres nacionalidaes europees- a finales del sieglu XIX y principios del XX, con antecedentes como’l Grupu Rexonalista Bretón (fundáu en 1918), el Partíu Autonomista Bretón (1924), el Partíu Bretón Nacional Revolucionariu (1931) o la Lliga Federalista de Bretaña (1931). Una historia que tien, tamién, un episodiu llamentable como foi l’apoyu d’una parte del Partíu Nacional Bretón a los nazis nel tiempu de la ocupación del Estáu francés por éstos na II Guerra Mundial; un fechu que diba estigmatizar y marcar negativamente al conxuntu del bretonismu nes décades posteriores, magar que tamién naquel momentu históricu contaba con intelectuales como Yann Sohier (internacionalista, antifascista y socialista, defensor del derechu a l’autodeterminación de tolos pueblos y fundador de la revista Ar Falz -La Foz-, un nome nada casual), Maurice Duhamel (políticu y músicu, escribiría’l llibru Histoire du peuple bretón, prohibíu poles autoridaes en 1939) o Francis Gourvil (abandonaría la militancia nel Partíu Nacional Bretón por desavenencies ideolóxiques y collaboraría cola Resistencia, siendo arrestáu pola Gestapo). 

El FLB tuvo un brazu armáu que fizo más de 250 acciones na década de los 70

Esa visión despectiva, que pesaba como una llábana sol movimientu bretón, diba escomenzar a cambiar a partir de la revolución de Mayu del 68, de la mano especialmente del ensayista y periodista Morvan Lebesque, que publica’l llibru Comment peut-on être breton? (¿Cómo puedes ser bretón?), convirtiéndose darréu nun éxitu y contribuyendo al resurdimientu del activismu político-cultural nel so país. Nesi momentu, la izquierda y los sectores progresistes tomen conciencia del fenómenu de la colonización interna  qu’exerce l’Estáu francés sobre Bretaña y del desaniciu sistemáticu de les sos llingües (el bretón -d’aniciu célticu- y el galó -de raigañu llatín, conocíu tamién como brito-románicu-) y cultura. Surden entós formaciones polítiques nueves como la Unión Democrática Bretona (organización socialdemócrata y autonomista, fundada en 1964, que ye la más implantada y influyente na actualidá), y contemporáneamente la Coordinadora Bretaña Independiente y Llibertaria (establecida por varios grupos anarco-independentistes nel 2001), Breizhistance (creada nel 2009, ye’l principal movimientu anticapitalista independentista actual) o la más recién Douar ha Frankiz (Tierra y Llibertá, constituyida nel 2020 y siguidora del confederalismu democráticu, teoría política impulsada pol kurdu Abdullah Öcalan). Tampoco tuvo’l movimientu nacional bretón llibre de la tentación armada, que garraría forma cola creación en 1966 del Frente de Lliberación de Bretaña y el so brazu militar l’Exércitu Republicanu (depués renomáu como ‘Revolucionariu’) Bretón (FLB-ARB), mui activos na década de los 70, con más de 250 acciones que teníen como oxetivu atentar contra símbolos del Estáu francés en tierra bretona o xendarmeríes de la policía; una actividá que diba decayer a principios de los años 80.

Glenmor foi un activista independentista d’orixe llabriegu. Activu dende los años 50, foi poeta, actor de teatru, escritor y compositor

Pioneros.
Como yá apuntamos, los años 60/70 son décades nes que la llucha de clases xorreció en Bretaña y venceyóse cola reivindicación del autogobiernu, remocicando al movimientu bretonista. Ún de los animadores más importantes de la cultura bretona nesi tiempu foi Glenmor, n’activo yá dende los años 50. Esti activista independentista d’orixe llabriegu fuere poeta, actor de teatru, escritor y compositor, sufriendo desprecios y castigos nel colexu por falar na so llingua materna. Dirixó’l so compromisu políticu hacia la música, componiendo delles de les canciones de llucha más importantes del movimientu bretón, casu de la titulada «Kan-bale an ARB», himnu de l’Armée Révolutionaire Bretonne, al qu’apoyaría activamente, mesmamente participando nuna fuelga de fame pa pidir la lliberación de dellos presos políticos acusaos d’entamar un atentáu contra’l Palaciu de Versalles en París. Nesos años surde un ensame d’intérpretes de canción bretona qu’espresen nes sos lletres les lluches y la vida de les clases populares. La mayoría d’ellos axuntáronse alredor del Manifeste de Plessala des Chanteurs Bretons (1972), nel que cincuenta artistes poníense «al serviciu del pueblu» y naguaben por reactivar y renovar la cultura bretona. Afalaron la creación de material teóricu, pero tamién el nacimientu de  cooperatives de músicos, too col oxetivu de lliberar al pueblu bretón «política, económica, social y culturalmente» (munchos d’ellos diben participar depués nel discu colectivu Skoazell Vreizh -1976- n’apoyu a les families de militantes encarcelaos).

El compromisu políticu de Gilles Servat fizo que versionara l’himnu obreru «Santa Bárbara bendita»

Ún de los firmantes d’aquel manifiestu foi Gilles Servat, autor d’una canción que se convertiría nun símbolu de la llucha pola independencia y el socialismu: «La blanche Hermine» (1971), un cantu a la unidá de los y les trabayadores bretones contra l’imperialismu francés; otres de les sos creaciones importantes son: «Gwerz Victor C’hara» («Balada de Víctor Jara»), «Les prolétaires», «Classes», «Daou dewezh eus Maria Otaegui» (contra’l franquismu), «Trugarekadenn» o «Ki Du»; como curiosidá hai que dicir que nel añu 2011 grabaría’l tema asturianu «Santa Bárbara bendita» nel discu tituláu Ailes et îles.

Otru poeta, guitarrista y compositor militante foi Evgen Kirjuhel, que nun yera d’orixe bretón pero al que Glenmor convenció p’abrazar la causa d’esi pueblu y caracterizóse pol refugu al sexismu y el fanatismu patriarcal que padecía la sociedá bretona de la época (una cuestión que trataría na pieza titulada «Les Mâles»). Pola ausencia de compañíes discográfiques interesaes en publicar les sos obres, en 1972, fundó un colectivu llamáu Droug, al traviés del que distribuyó los sos primeros discos de forma independiente. Tien fecho cantares sobre Bretaña y socedíos concretos de la so historia recién como fuelgues, manifestaciones o lluches obreres.

Del mesmu calter militante ye Gweltaz Ar Fur, un cantautor que tuvo conciencia de la so identidá nacional a los catorce años y na década de los 60 utilizó la so voz y la so guitarra acústica como mediu de denuncia y apoyu a les fuelgues de los presos del Frente de Lliberación de Bretaña, destacando l’emblemáticu cantar «Frankiz ar Vretoned». Enantes de convertise en llibreru, participó na fundación de les escueles Diwan (con un sistema d’inmersión llingüística en bretón) en 1977, collaborando colos artistes más importantes del remanecer musical bretón.

Gweltaz Ar Fur foi exemplu de militancia y compromisu
Storlok foi la primer banda de rock bretona, con lletres de denuncia social

Un casu particular ye’l de Youenn Gwernig, quien se treslladó a los Estaos Xuníos a finales de la década de 1950. Ellí fíxose amigu del escritor Jack Kerouac y escomenzó a facer música na qu’amiesta’l folk cola cultura pop estauxunidense, la xeneración beat y la tradición celta del so país d’orixe, al que va volver na década siguiente. El primer discu grabaríalu en 1971, nel que s’inclúi la icónica «Les derniers bougnoules», na que la condición del pueblu bretón asóciase cola d’otros pueblos discriminaos en suelu francés (el términu bougnoul ye un nome despectivu utilizáu pa definir a árabes, negros y romaníes); el cantar acaba mui significativamente cola frase: «lec’h mont d’an Amerik / aet en gant’n FLB» («en vez d’América / incorporéme al FLB»).

Por supuestu, hai que facer referencia al músicu bretón más conocíu de tolos tiempos, Alan Stivell, verdaderu impulsor de la renovación de la músca bretona dende los años 70. Foi altavoz de lluches diverses, fundamentalmente les del pueblu bretón (y del interceltismu en xeneral), pero tamién d’otres de calter igualitariu o ecoloxista. Ente les sos obres más importantes ta la titulada Raok Dilestra (Enantes de desembarcar), un álbum conceptual sobre la historia bretona, publicáu en 1977, que quier ser un llamamientu a la «lliberación nacional frente a una historia falsificada pola burguesía», conteniendo ente los cortes los titulaos «Marw Ewid E Fobl» (dedicada al miembru del FLB Yann Kel, muertu al españar l’artefactu que diba colocar nun emplazamientu militar francés; tamién-y dedicaríen canciones otros intérpretes como Glenmor o Youenn Gwernig) o «Naw Breton ‘Ba’ Prizon» (n’apoyu a a los prisioneros políticos bretones). Un compromisu que lu llevaría a apoyar otres lluches de lliberación nacionales como la irlandesa, incluyendo un tema dedicáu al miembru del IRA Bobby Sand (muertu nuna fuelga de fame en 1981) tituláu «Hidden trough the hills» nel álbum Bed an dud vew (1981).

Entrevista a Alan Stivell n’Asturies que dixitalizamos dende l’AMCA (Archivu de la Música Contemporánea Asturiana)

A estos solistes hai qu’añader el llabor de formaciones históriques como Storlok, consideraos la primer banda de rock bretona. Tuvieron n’activo namás unos añinos (1976-1980), nos que grabaron un single y un LP nos qu’apaez «Gwerz maro Jorj Jackson» («La balada de George Jackson»), dedicada al militante de los Panteres Negres asesináu en prisión por un carceleru, o «Keleier Plogoff», que fala de la batalla contra la construcción d’una central nuclear nel llugar de Plougoñ (Plogoff), un pequeñu pueblu de pescadores qu’en 1980 entamó una llucha exemplar pa torgar la instalación d’una planta d’eses característiques y que foi una de les victories ecoloxistes más renomaes nel Estáu francés. Pela so parte, Tri Yann -activos dende los años 70- tamién se punxeron del llau de les movilizaciones populares contra’l proyectu nuclear en Plogoff, fechu al que se fai referencia nel discu An Heol A Zo Glaz (1981); tienen grabaes tamién delles pieces que traten sobre lluches centenaries del pueblu bretón.

Anguaño.
Na actualidá, nuna escena musical como la bretona, mui numberosa y variada, nun podíen faltar los solistes y grupos con un componente políticu reseñable. Unos de los más conocíos son Les Ramoneurs de Menhirs, esponentes máximos del punk anarco-celta que tienen rexistrao versiones mui personales de temes como «La blanche Hermine» (Gilles Servat), «Bella ciao» (qu’ellos titulen «Bell’ARB»), «Viva la revolution» (The Adicts) o «La Makhnovtchina» (himnu de la revolución anarquista ucraniana); otres bandes punk comprometíes son Tri Bleiz Die, Trouz An Noz o Digresk. Más exemplos activos de los últimos años son el crossover militante de rap y rock de Rhapsoldya, el celtic-rock de Daonet, el rock progresivu del guitarrista y cantante Brieg Guerveno o’l ska-punk de Fiskal Bazar. A ellos hai qu’amestar una serie de bandes «mestices» con una filosofía antirracista marcada enforma: Collectif Jeu à la Nantaise (amiestu de música bretona y arxelina), Taÿfa (combinen la tradición musical bretona cola tamazight y l’árabe-andalusí, con testos que falen sobre la miseria o pueblos en rebelión) o Renésens (que faen lo qu’ellos llamen Musik Kréoloceltik, un amiestu de soníos y instrumentos bretones y criollos de la isla de Reunión, con lletres de denuncia sobre temes como’l racismu, el mediu ambiente o la represión llingüística).

Versión que faen del himnu «La blanche Hermine» de Gilles Servat la banda referencia del anarco-punk celta

El sistema musical bretón ye, probablemente, ún de los más dinámicos y ricos de toa Europa, sofitáu na so tradición diversifícase en milenta propuestes qu’inclúin los soníos y estilos más estremaos. A esti aspectu musical súmase tamién un compromisu socio-políticu que vien manifestando dende décades, dende l’orixe de la renovación y actualización de la música bretona nos años 60 del sieglu XX. Y ello como consecuencia de la toma de conciencia de vivir nun país, nuna llingua y nuna cultura minorizada, pero que quier abrise al mundu y tener futuru.

SIENTI LA NUESTRA PLAYLIST DEDICADA A LA MÚSICA Y POLÍTICA EN BRETAÑA

XUNE ELIPE

Dexa un comentariu

X