Yá hai más novedaes de La rabia nos dientes, el segundu trabayu qu’Ochobre va asoleyar esti branu. La banda rock astur ta acabante de presentar nes sos redes sociales la portada del álbum, obra del diseñador Iago Datriga que ta renovando dafechu tola imaxe gráfica de la formación. Tamién anunciaron les feches nes que van publicar los primeros adelantos del trabayu: 6 de xunu llancen ‘Sélo‘ y el 20 de xunu ‘Los naides‘.
Siete años dempués del so estrenu discográficu –Sobredosis de Grisú– y cuatro desque asoleyaren el cenciellu ‘Autodefensa Muyer‘, la banda punk-rock va tornar con un discu de nueve temes. Pablo Viña ye’l productor d’esti álbum nel que va poder sentise nún de los temes la collaboración d’una de les voces de muyer del rock astur, Pitxe -Skontra, Brutus’ Daughters, The Cilvrnigans, Bronca-. «Les lletres del discu siguen siendo la bandera d’Ochobre: munchu pesu social, munchu compromisu y muncha conciencia de clase. Seis de les nueve tán compuestes por Adrián Calvillo, l’anterior cantante del grupu», desplica Natalia González.
La rabia nos dientes va espeyar la so evolución dende’l so caberu trabayu, mesmo no musical que no visual, como comenta la gaitera: «Préstanos pensar que l’esfuerzu puestu na evolución musical del grupu nesti discu pue percibise tamién a güelpe de vista. Anque hai tres temes que filen más directamente col discu anterior, más apegaos al punk rock cenciellu y directu; alcontramos otros seis qu’entamen a beber d’otros estilos: enfotándose más nel punk melódicu pero con llixeres influencies del hardcore, el celtic punk o incluso’l metal».
«Mui pronto tará’l discu completu en toles plataformes y tái sollertes, porque nunes selmanes abrimos preventa con merchandising nuevu y llámines cola portada«, publicaron tamién Ochobre nes sos redes sociales al rodiu d’una preventa que va facese dende la tienda online de Musicasturiana.com.
Suscríbite a les nuestres novedaes
