Diez años dempués de qu’entamaren el so camín y llueu d’asoleyar un EP y dellos singles, el primer álbum de llarga duración d’Alienda yá ye una realidá. La banda de folk celta llanza güei en plataformes dixitales y pon a la venta en CD Alienda, un discu de 12 temes de composición propia y reellaboraciones de pieces tradicionales. El domingu 30 d’abril a les 19.30h van presentalu en directo nel Teatru Riera de Villaviciosa.
«Lo que queremos tresmitir nel discu ye fuercia, frescura, optimismu y allegría, tanto na música como nes lletres» desplica Bárbara González-Quevedo, violín y voz de la formación. L’álbum grabóse nos Tutu Estudios de Corvera l’añu pasáu y foi «cocináu a fueu lentu y con munchu trabayu y esfuerzu». «La grabación foi retrasándose poles situaciones que vivimos nos últimos años, como l’andanciu, pero llevamos munchu tiempu queriendo asoleyalo y pareznos qu’agora, qu’amás facemos 10 años como grupu, yera’l momentu ideal», añade González-Quevedo.
Alienda ye una banda que tuvo marcada pola inestabilidá dende l’entamu, a cuenta de la so mocedá y la emigración de dellos de los sos componentes. Sicasí, la cantante y violinista plantega que yá algamaron afitar el proyectu: «Tenemos agora mesmo una banda estable y con una visión y un gustu musical que faen una combinación y un equipu col que tamos mui contentos y agustu. Naguamos por siguir faciendo música munchu tiempu más y crecer tolo que podamos como grupu, como venimos faciendo dende 2013».
Conciertu de presentación
«El conciertu de Villaviciosa ye mui especial y emotivu pa nós… Porque ye la presentación del primer discu, porque ye en casa y nesi teatru que mos encanta y porque ta preparáu con munchu ciñu pa tresmitir tolo que llevamos tantu tiempu preparando», desplica Bárbara González-Quevedo alrodiu l’actuación que van dar esti domingu nel Teatru Riera a les 19.30h y con entrada llibre. Illán Escalada a la gaita y la voz, Francisco Rodríguez Buznego al bouzouki, Edu Llosa García a la batería y percusión, Carlos Castro Vázquez al baxu y Emilio Amboage Rodríguez a la guitarra; y Bárbara González-Quevedo al violín y voz, van amosar qu’hai futuru nel folk celta asturianu.
Suscríbite a les nuestres novedaes
