Preséntase una moción en Xixón pa garantizar y promover la música n’asturianu y la llibertá d’espresión

Güei a les 11.15h presentóse en rueda prensa les 4.200 firmes verificaes y protagonizaes pol sector cultural qu’apoyaron el manifiestu «Música n’asturianu SÍ». Intervinieron David Varela, Leticia Baselgas y Xicu Ariza en representación del manifiestu, arroparon persones de la música y cultura d’Asturies y les entidaes Sociedad Cultural Gijonesa, Asociación Grana, la Caja Músicos, Sociedad Cultural Gesto y Atenéu Obreru, Xunto a estes entidaes anunciaron la presentación d’una moción al Ayuntamientu pa garantizar y promover la música n’asturianu y la llibertá d’espresión. Amás pidieron que l’alcaldesa Carmen Moriyón «rechace contundentemente les palabres y les intenciones de la so compañera de gobiernu» y que Sara Álvarez Rouco «debería ser cesada como conceyala de Festexos».

Esta ye la intervención completa

Mui bonos díes a toes y toos. Gracies por acudir a esta rueda de prensa convocada pol sector musical d’Asturies y por otres entidaes culturales de Xixón. Lo primero de too, recalcamos qu’esto ye namás una rueda de prensa, nun ye nenguna concentración nin una manifestación. Quiximos facer esta rueda na Plaza Mayor, a puertes del Ayuntamientu, pol simbolismu que supón que dende la Casa’l Conceyu se nos quiera escluir d’actuar n’eventos festivos que se faen nesta mesma plaza y notros espacios públicos. Y quixeron venir a sofitanos persones vinculaes al mundu de la música y la cultura; pero esto nun ye una movilización al usu y queremos dexar constancia d’ello.

Aclarao esto, entamamos diciendo tamos ablucaos y tristes por tener que tar dando esta rueda de prensa. Pareznos surrealista tener que responder a unes intenciones tan graves como son les de nun querer programar música n’asturianu nos eventos festivos en Xixón. Estes declaraciones tuvieron 11 díes ensin matizase de nenguna manera y consideramos que, si tuvieron que rectificase en parte, foi pol descontentu social qu’ellos mesmos xeneraron. Pero cola rectificación llegó un nuevu esperpentu; el de querer persiguir la llibertá d’espresión de los propios artistes. Por eso repetimos dalgunes de les preguntes que nos pasaron pela tiesta a lo llargo d’estos cuasi 15 díes: ¿Qué pasaría si en Barcelona se quixera prohibir actuaciones de música en castellano? De xuru que sería portada de tolos medios de comunicación. ¿Por qué van poder siguir viéndose actuaciones musicales d’artistes qu’apoyen a la llingua asturiana y la so oficialidá en Madrid, París, Beirut, Nueva York, Sidney o Buenos Aires, pero non en Xixón? Les respuestes son evidentes, porque ésto nun hai per onde lu garrar.

Tovía asina, la gravedá d’esti intentu de vetu trainos güei equí, a contestar con rotundidá, como sector musical asturianu, a la discriminación y a la persecución de la llibertá d’opinión. Por eso presentamos les más de 4.200 firmes individuales y colectives qu’apoyaron el manifiestu “Música n’asturianu SÍ”. Son principalmente firmes de persones y entidaes venceyaes al sector musical asturianu, pero  tamién d’otres organizaciones sociales y culturales, asina como ciudadanos que quixeron mostrar la so disconformidá y enfadu.

Equí firmen músicos, grupos d’estilos musicales mui diversos, orquestes, agrupaciones de baille tradicional, bandes de gaites, intérpretes de tonada, centros asturianos, empreses diverses rellacionaes cola industria musical, festivales, comisiones de fiestes, periodistes y medios de comunicación musicales, docentes n’escueles musicales y nel conservatoriu, investigadores y profesores de varies universidaes, etnógrafos, escritores de lletres de canciones, xestores culturales, actores de videoclips, realizadores audiovisuales, sales y bares nos qu’hai conciertos… y un llargu etcétera que reflexa la importancia que tien el sector musical a nivel social, cultural y, por supuesto, económicu.

Nestes firmes ta representada prácticamente la totalidá de la escena musical n’asturianu, pero tamién munchos nomes y entidaes que faen música n’otres llingües, tanto de dientro como de fuera d’Asturies. Porque esti ataque nun ye namás hacia la música n’asturianu; ye un ataque qu’afecta a tol sector musical -independientemente d’en qué llingua canten-, a toles persones que crean y construyen la nuesa cultura n’Asturies, especialmente, a los que lo faen en llingua asturiana, y a toles y tolos falantes d’esti idioma. Amás, dende’l llunes tamién ye un ataque a la llibertá d’espresión. Ye imposible mentar a tolos firmantes y por eso facemos públicu’l llistáu; pero si nos ponemos mediáticos, destacamos nomes de sobra conocíos que trescienden muncho más allá de les fronteres asturianes. Son artistes como RODRIGO CUEVAS, HEVIA, ROZALÉN o RIGOBERTA BANDINI, amás de grupos que van actuar esti mesmu branu en Xixón como VETUSTA MORLA o DESAKATO. Damos gracies fonderes a tola xente que nos ta apoyando y tamién a les persones non vinculaes a la música y a otru tipu d’entidaes como sindicatos, partíos o asociaciones sociales que firmaron el manifiestu, ente elles munches pertenecientes al sector de les artes escéniques, que tán tamién directamente afectaes.

El manifiestu que sacamos la selmana pasada retrucaba a les declaraciones que dixo lliteralmente la conceyala, diputada y Vicepresidenta de Vox. Respondíemos con 7 puntos mui claros que facíen referencia a cuestiones que tienen que ver colos derechos llingüísticos, culturales y llaborales; cola economía asturiana; col patrimoniu; cola pluralidá de la música n’asturianu y l’éxitu de les actividaes festives nesti idioma; o cola propia imaxe que la ciudá quier amosar énte’l mundu.  

A too esto, tenemos que sumar agora la gravedá manifestada esta selmana de programar a artistes o non en función de si canten n’asturianu o de cuála ye la so opinión sobre la oficialidá, volviendo a los tiempos de la censura previa- Una nueva barbaridá qu’atenta directamente contra l’artículu 20 de la Constitución referíu a la llibertá d’espresión.

Por eso tamos equí pa decir tamién qu’a unes declaraciones y intenciones tan graves nun se-yos da respuesta únicamente con un manifiestu como esti. Tampoco van quedar impunes nin silenciaes por munches cartes qu’escriba l’alcaldesa Carmen Moriyon a Gijón/Xixon tratando de blanquear les intenciones discriminatories de los sos socios de gobiernu. Queremos que se respeten los nuestros derechos y se cumplan les lleis; y necesitamos garantíes de que tolo que dixo la señora Rouco nun vaya facese realidá. 

D’esta manera, damos esta rueda prensa arropaes por persones del sector musical y axuntámonos con varies entidaes qu’amosamos públicamente la mesma preocupación: la Sociedad Cultural Gijonesa, Asociación Grana, la Caja Músicos, Sociedad Cultural Gesto y l’Atenéu Obreru. Toes estes entidaes plantegamos lo siguiente:

1. Insistimos en que les intenciones de Vox nun pueden llegar a facese realidá. Y p’asegurar qu’esto nun pase nin esplícita nin implícitamente, vamos defendenos coles lleis. Que nos eventos festivos nun se contrate a artistes y entidaes qu’utilicen l’asturianu como llingua de creación o que manifiesten idees en favor del asturianu, ye una vulneración de derechos y amás supón l’incumplimientu de, polo menos, la Constitución Española, Llei de Contratación Pública, la Llei d’Usu y Promoción del Asturianu y el Plan de Normalización Llingüística de Xixón.
   
   Polo tanto, vamos meter agora mesmo una moción al plenu del Ayuntamientu de Xixón pa qu’esta ciudá garantice que pueda haber actuaciones d’artistes y entidaes qu’utilicen l’asturianu como llingua d’espresión. Que lo garantice y tamién que lo promueva a traviés de Divertia y de les conceyalíes de Festexos, de Cultura y d’Educación. 
   
   Facer esto significa protexer y difundir una parte fundamental del patrimoniu asturianu, apoyar a un sector de la nuestra economía; el sector de la industria cultural; y cumplir cola llexislación vixente. Por supuesto, les llibres opiniones de los artistes a favor de la oficialidá del asturianu nun deben afectar nin lo más mínimo a la programación cultural y festiva.

2. Esiximos una declaración per parte de l’Alcaldesa de Xixón, Carmen Moriyón, na que rechace contundentemente les palabres y les intenciones de la so compañera de gobiernu. Que la máxima responsable nesta ciudá asegure qu’en Xixón nun va facese realidá esta discriminación que vulnera derechos y lleis. Hubo un silenciu intolerable durante 10 díes per parte d’esta nueva corporación municipal y l’Alcaldesa namás respondió con un artículu nel periódicu que nun garantiza nada nin rechaza les gravísimes declaraciones y intenciones de Vox.
   
3. Creemos qu’una persona que quier discriminar a una parte de la población y del sector cultural asturianu, nun debería dirixir la conceyalía de Festexos d’esta ciudá. Polo tanto consideramos que la tamién diputada autonómica y vicepresidenta de Vox Asturias, Sara Álvarez Rouco, debería ser cesada como conceyala de festexos de Xixón, lo cual tamién implica que la empresa pública Divertia nun tendría de tar en manes de quien comparte esos mesmos planteamientos.

Y yá p’acabar recordamos que tamos entamando’l branu y con él va haber nesta ciudá muncha xente de tol mundu y tamién van actuar nella munchos artistes. Si nun hai una respuesta pue aumentar la movilización y facese muncho más visible nos espacios públicos esti conflictu inventáu por Vox. Preguntamos al Ayuntamientu, ¿qué imaxen queréis que dea esta ciudá? ¿Queréis mostravos como una ciudá asturiana del sieglu XXI o como una qu’insólitamente discrimina a una parte de la población y de los sos trabayadores en función de les sos opiniones y de la llingua qu’empleguen? Ta nes vuestres manes decidir qué Xixón queréis construir pa la xente d’esta villa y pa enseñar al mundu. Si queréis qu’esto seya esi Xixón del alma que tien «embrujo y alegría» o que seya «la ciudá más triste d’esti país”. Ustedes verán.