Tres de presentase públicamente’l pasáu 22 de xunu nel RIDEA, el Conceyu de la Gaita da güei un pasu más na so constitución. A les 19h nel salón d’actos de la Casa la Cultura de Noreña va celebrase la I Asamblea Xeneral Estraordinaria de la entidá. Nella va procedese al rexistru de nueves persones asociaes y va escoyese a la Xunta Directiva Permanente. L’actu, con duración prevista d’una hora tien el sofitu del Ayuntamientu de Noreña de l’Asociación Folklórico-musical Villa y Condáu de Noreña.
El Conceyu de la Gaita ye una asociación col ánimu de dinamizar el mundu de la gaita dende un xeitu tresversal. Esta asociación quier ser un llugar onde facer comuña, alendar actividaes y proyectos y ufrir rempuestes a les necesidaes que tienen la xente amante de la música y la cultura asturiana, tanto profesionales como aficionaos.
La primer Xunta Provisional de la entidá tuvo formada por: presidente Flavio Rodríguez Benito (mayestru nel Grau Profesional de Gaita del Conservatoriu d’Uviéu), vicepresidente Rodrigo Fernández Joglar (pedagogu y graduáu profesional en gaita asturiana), secretariu Tomás Esolá Muñiz (Inxenieru de Mines y gaiteru), tesoreru Esteban González Corteguera (llicenciáu en Medicina y gaiteru) y los vocales Chus Solís (artesanu de gaites), Pelayo Fernández Fernández (doctor en Inxeniería Industrial, gaiteru y artesanu de payueles) y Luis Álvarez Pola (doctor en Musicoloxía y gaiteru). Esta tarde va salir escoyida la Xunta Directiva Permanente.
.
Suscríbite a les nuestres novedaes
