Güei ye l’últimu día p’asociase a preciu rebaxáu a L’Ensame, la campaña de sofitu a Musicasturiana.com en 2023. L’añu pasáu fuimos llanzando a traviés de stories d’Instagram delles razones de por qué asociase a musicasturiana.com. Darréu ponemos les imáxenes de tolos motivos que consideramos importante pa sofitar un proyectu como esti.
Otru añu más ponemos en marcha la campaña de sofitu a esti proyectu a traviés de cuotes de socios y socies. Dende güei y hasta’l 21 de xunetu la xente que quiera pue asociase a L’Ensame de musicasturiana.com a preciu rebaxáu. Hai tres cuotes: 15 €, qu’inclúi un 5% de descuentu pa toles compres y participaciones en sorteos; 30 €, qu’inclúi tolo anterior más 2 artículos de regalu ensin gastu d’unvíu; y 60 €, qu’inclúi el 5% de descuentu y les participaciones de sorteos, amás de 4 artículos de regalu y 1 exemplar del Anuariu de la Música Asturiana 2022 ensin gastos d’unvíu. La xente que s’asocie va poder disfrutar de les ventaxes de L’Ensame a lo llargo d’un añu.
El presupuestu d’un proyectu profesional y integral como’l de Musicasturiana.com ye eleváu; por eso ye necesario algamar financiación pa caltener el mayor portal dixital especializáu na música n’asturianu y gallego-asturianu. En 2021 foron 89 les persones s’asociaron a esta iniciativa y en 2022 fueron 100 persones Too esto ayuda a caltener gastos básicos del proyectu y a fomentar la venta de música.
Precisamente, vender más CDs, vinilos, llibros o artículos de merchandising ye ún de los oxetivos cimeros de L’Ensame. Gracies a la xente que s’asoció en 2021, los artistes y discográfiques del país vendieron más de 200 referencies más, convirtiéndose esta campaña nuna fonte de financiación afayadiza non namás pa musicasturiana.com, sinón tamién pa tola industria musical n’asturianu que forma parte del catálogu d’esta tienda.
Posibilidá de renovación automática
Como novedá d’esti añu, la xente pue asociase escoyendo la “renovación automática” p’asina tar tolos años con suscripción a L’Ensame ensin que faiga falta renovar la cuota. Por último, sorrayar que les cuotes 2 y 3 tán rebaxaes hasta’l 21 de xunetu ; quien s’asocie dempués d’esa fecha va tener que pagar 40 € y 80 € por eses cuotes qu’hasta esi día cuesten 30 € y 60 €.
Suscríbite a les nuestres novedaes
