Anque pol tiempu nun lo paeza, tamos yá na seronda y con esta estación aporten destacaos eventos que tienen a la música n’asturianu como protagonista y a la seronda como escusa: el Festival Seronda de Llangréu d’esti sábadu 14 d’ochobre; la Feria de Seronda n’Illas el 14 y 15 d’ochobre; la fiesta de la Serondaya de Cenera (Mieres), del 27 al 29 d’ochobre; y la Seronda d’Avilés los díes 27 y 28 d’esti mes. Ente los tres eventos axunten un total de quince actuaciones de música n’asturianu, amás de programar conciertos d’otros artistes de fuera d’Asturies.
Esti sábadu el Nuevu Teatru de La Felguera acueye’l Festival Seronda 13, un eventu que surdió nel añu 2009 de la mano del Coleutivu de Baille y Música Tradicional L’Enguedeyu, nun intentu de dar un pasu más en tol trabayu que se venía realizando en materia de la defensa y divulgación de la cultura asturiana, reconociendo a partir d’esi momentu con un gallardón —L’Enguedeyu de Bronce— a aquelles personalidaes o instituciones que destacaren nesa llabor. Esti añu’l premiu va ser pa la mítica formación de rock n’asturianu Los Berrones y, amás de la entrega del galardón, va actuar L’Enguedeyu. P’acompañar a la música’l país tamién va haber teatru con Kumen y un conciertu de Xisco Feijoó, músicu de la escena tradicional gallega.
Tamién esti fin de selmana celébrase n’Illas la XVI Feria de Seronda na que va haber pal sábadu 14 gaita y tambor a les 17h y Baxel van tocar a les 19h. El domingu a les 13h actúa la bandina La Garrapiella y a les 19h l’agrupación folclórica Ximielga la Saya. Too ello en La Caizuela, acompañáu d’un mercáu d’artesanía y otres actividaes.
L’Asociación Cultural Serondaya de Cenera (Mieres), vuelve a entamar otru añu más la Fiesta de la Serondaya. La cita arranca’l vienres 27 a les 20h col pregón del cantante Chus Pedro y la entrega del Premiu de la Cultura 2023 a l’Academia de la Llingua Asturiana. A les diez de la nueche van tocar Skama la Rede col so punk-ska-folk. Pal sábadu 28 les actuaciones musicales entamen a les 18h col Grupu Ruxidera, al que van siguir les bandines Los Gascones (19h), Los Llerones (20h), el grupu chigrebilly Ilustres Patilludos (22h) y la banda mecigayu-ska La Tarrancha (23h). La programación de música de raigañu zárrase’l domingu 29 a les 13h cola actuación de la Banda Gaites de Mieres.
Pa completar esti tríu de destacaes cites de seronda cola música’l país ta la XX Seronda d’Avilés. La Federación d’Asociaciones Xuntanza d’Avilés entama nel mercáu de la Plaza de les Aceñes esti eventu qu’arranca’l vienres 27 a les 19.15h cola Bandina Cuatrolán, formación que repite actuación a les 21.30h. A les 20h Xaréu d’Ochobre y Escontra’l Raigañu van amosar bailles y sones tradicionales y a les 22h toca la banda cántabra de folk actual Casapalma. Pal sábadu 28 la programación musical entama bien ceo: a les 12h ye’l turnu de la orquestina La Xarangana, a les 12.30h hai cantares de chigre col Orfeón de Castrillón y, llueu d’otres actividaes más, a les 20.30h son los conciertos Rubén Alba y Nel de Purnea y a les 21.30h de José Manuel Tejedor.
Suscríbite a les nuestres novedaes
