Villaviciosa y Cabrales acueyen un añu más estos dos festivales vertebraos pola música asturiana y el folk. El III Válgame Fest va poder esfrutase los díes 10-11-12 de mayu n’Arenas, mientres que’l Festival Internacional de la Gaita (FIG) de Villaviciosa va desendolcase cuatro meses depués, ente’l 5 y el 8 de setiembre.
La Banda Gaites Villaviciosa-El Gaitero, entidá organizadora del FIG, trabaya na 17ª edición d’un festival que nos últimos tiempos algamó’l convertise nel más importante de tolos que se celebren al rodiu la gaita. Col enfotu de volver a iguar un programa d’actividaes lo más ampliu y atractivu posible, acaben d’incorportar de manera definitiva al so equipu de trabayu a xente venceyao al mundu de la música tradicional que yá venía andechando puntualmente nes pasaes ediciones, como principal novedá pa esti añu 2024. El FIG nun apara de crecer.
Yá na cabera edición en 2023, del 31 d’agostu al 1 de setiembre, el públicu pudo asistir a un conciertu d’entamu, l’alcuentru de bandes de gaites (con representación d’Asturies, Galicia, Castiella y Italia), una esposición sobre’l traxe tradicional asturianu, mercáu agroalimentariu y artesanu, nueche en danza, actuaciones de bandines de música tradicional pelos chigres, certame de tonada, concursu de gaita y una potente nueche folk colos grupos Alienda, Project Smok (Escocia), Llan de Cubel y Deira.
Válgame Fest en Cabrales
L’oriente espera la tercera edición del Válgame Fest, un festival de música folk-rock qu’apuesta polos grupos asturianos y que na so segunda edición, ente los díes 6 y 14 de mayu de 2023, cuntó coles actuaciones de Jose M. Tejedor, Llan de Cubel y Skontra. Amás, Los Gascones punxeron música a les cais d’Arenas y al mercáu d’artesanos. Completaron la programación una tarde de xuegos tradicionales a cargu de 6 Conceyos y dos actividaes alrodiu del baille del Corri-Corri: esposición nel Atenéu Cabraliegu y charra de Yolanda Cerra.
Suscríbite a les nuestres novedaes
