El Maízu Rock enllena Intriago (Cangues d’Onís) de rock y punk esti fin de selmana. L’Asociación Cultural Sintir celebra el X aniversariu del festival con dos díes de conciertos y el pasu de más de diez grupos pel escenariu. El rock astur suena mañana, vienres 5, con Dixebra, Skama la Rede, La Tarrancha y Ochobre, una amuesa del compromisu de la organización cola música n’asturianu y les bandes más mítiques del país, a falta de Skontra, que tuvo presente n’otres ediciones del eventu.
Los soníos de la banda decana del rock n’asturianu Dixebra, la formación punk-ska Skama la Rede -que s’alcuentra anguaño festexando’l so venti aniversariu-, el veteranu grupu de mecigayu-ska La Tarrancha y Ochobre -banda punk-folk heredera del camín andáu por toos estos proyectos de rock astur– completen la primer nueche del festival. El sábadu 6 van ocupar l’escenariu grupos d’otros territorios como’l Bierzo, Burgos, Cantabria o Barcelona, pero la música asturiana va siguir sonando na sesión vermú con dalgún cantar del raperu xixonés Doris Escarlata y el conciertu de la banda piloñesa de punk Karank. Tanto la entrada como l’acampada pal Maízu Rock son de baldre.
Na semeya, actuación de Dixebra n’Uviéu 2016. Autoría de Samuel Monte-Arrieta.
Suscríbite a les nuestres novedaes
