La pianista lluanquina Claudia González Rodríguez fina’l Mastér de Lied «Victoria de los Ángeles» na Escola Superior de Música de Catalunya col TFM L’asturianada con piano de Baldomero Fernández. Grabaciones con Obdulia Álvarez ‘La Busdonga’ y Ángel González ‘El Maragatu’, un trabayu empobináu al estudiu de los arreglos pa pianu que compuso’l músicu uvieín nes primeres décades del sieglu XX.
Depués de meses d’investigación, el resultáu ye un testu nel qu’afonda nes tonaes «Al pasar por el puertu«, «Torna la gocha» -más conocía anguaño como «Arrimadín a aquel roble»- y «Pasé’l puertu de Payares» al traviés de los manuscritos y rexistros sonoros conservaos col oxetivu de recuperar y difundir esti repertoriu nel ámbitu de la música académica. Amás, formula una propuesta d’interpretación dende l’aplicación práutica del analís fecho y la so esperiencia como música clásica respetando l’heriedu de la tresmisión oral y la tradición asturiana.
Baldomero Fernández Casielles (Uviéu, 1871-1934) foi ún de los cabezaleros del nacionalismu musical asturianu na época d’ente-sieglos. La so actividá como pianista y compositor, asina como les grabaciones que fizo col sellu Gramophone (Barcelona) xunto a los míticos Ángel González «El Maragatu» y Obdulia Álvarez «La Busdonga» foron determinantes pa la supervivencia y conservación del xéneru de l’asturianada. Dedicó gran parte de la so vida a la interpretación y creación de música inspirada nel folclor d’Asturies, asina como a recopilar y armonizar melodíes populares recoyíes nos volúmenes Cuarenta canciones asturianas y De la tierrina. Álbum de canciones para canto y piano, una partitura manuscrita entá ensin editar.
Delles reivindicaciones
La pianista reclama un cambéu de perspeutiva na escena musical clásica asturiana: «Investigando sobre’l contestu cultural d’Uviéu nos caberos años del sieglu XIX y entamos del XX, descubrí que la música asturiana yera una parte más de la escena relacionada colos músicos académicos. Tocábase y cantábase en llocales populares, pero tamién llenaba los teatros de la ciudá y les reuniones en salones privaos de l’aristocracia y burguesía». D’esta miente, la lluanquina sorraya que «otra programación ye posible, una que nun dexe a la cultura popular y, especialmente, a la música asturiana relegada a los formatos que yá conocemos. Falta voluntá de llevar lo asturiano a los auditorios y conciertos nel ámbitu de la música clásica o, si se quier, académica». Amás, nun escaez tampoco la «falta d’inversión institucional n’infraestructures necesaries pa la conservación del patrimoniu musical como l’abandonáu Archivu de Música d’Asturies, qu’agora mesmo son unes caxes guardaes nel sótanu de la Biblioteca del Fontán».
Suscríbite a les nuestres novedaes
