Güei, miércoles 7, va celebrase n’Avilés un alcuentru n’alcordanza de Carlos García y Maribel Alberti, dueños d’El Cafetón d’Avilés que finaron esta selmana. La Fonte de la Plaza del Sol va atestiguar a les 19h una xuntanza pola memoria de Carlos y Mari, dos persones fondamente estimaes n’Avilés y toa Asturies que tuvieron una muerte voluntaria’l pasáu llunes nun hotel de Lleón.
Dende qu’abrió les sos puertes en 2001, El Cafetón convirtióse n’ún de los espacios fundamentales pa la música asturiana, contribuyendo dende va décades al xorrecimientu d’esta escena. Dientro y fuera d’esti chigre, Carlos y Mari entamaron eventos como’l Sol Celta, jam sessions, milenta conciertos y otra montonera d’actividaes culturales estremaes. Tanto, que son mui pocos los músicos y músiques d’Asturies los que nun tuvieron colos sos instrumentos tocando ellí.
Dende musicasturiana.com llamentamos fondamente esta perda y damos-y milenta gracies a Carlos y Mari por recibir les nuestres iniciatives y propuestes siempre con una sorrisa na boca y con bon tratu. Tamién por tolo que ficieron pola música del país y por otres causes sociales, contribuyendo dende Avilés a algamar una Asturies más xusta, solidaria y arguyosa de la so identidá. Esta tarde va facese alcordanza de lo que foron y l’heriedu que mos dexaron.
Suscríbite a les nuestres novedaes
