Como cada últimu sábadu d’agostu dende hai más de 40 años, l’alameda de Porcía, nel conceyu d’El Franco, acueye la Noite Celta de Porcía. Esta edición aporta con un cartelu qu’entemez veteranía y mocedá, amás de la yá habitual participación d’un grupu foriatu. La nueche va arrancar a les 21.30h cola actuación de la Banda de Gaitas Marino Tapiega (Tapia). Dempués va sonar la música celta new-age de Guieldu, el folk de Llan de Cubel, el tríu astur-andaluz Deira y el grupu bretón Startijenn, que tornen a Asturies tres del so conciertu nel FolkAyer 2023. L’eventu ye de baldre y tamién va haber sardinada gratuita pa tola xente que s’avere hasta’l festival celta que más años lleva faciéndose ininterrumpidamente n’Asturies.
Amás, la víespera de la Noite Celta, 30 d’agostu, a les 20.30h, van presentase’l discu Daón de Beleño y el llibru El Celtismu Musical Asturianu cola presencia d’Iván de Cazarón -Asociación Alameda-, Xuan Prado y Frankie Delgado -Beleño-, y Lisardo Lombardía y Ignaciu Llope -Fundación Belenos-. Dempués, l’Asociación Alameda entama una Espicha y Noite en Danza a la que-y van poner música el grupu de pandereteres Herbamora y los bretones Startijenn. La entrada tien un preciu de 25 € y puede reservase nes redes sociales de la Noite Celta de Porcía.
Suscríbite a les nuestres novedaes
