Esti fin de selmana celébrase na alameda de Porcía (El Franco) la 41 edición de la Noite Celta de Porcía, la cita más veterana que tien Asturies cola música’l país. Dempués d’anunciar los conciertos del sábadu 30, la organización del eventu ta acabante de presentar les actividaes pal vienres 29. A les 20.30h, la carpa d’El Fornello va acoyer la mesa redonda De Corao a Porcía. Os primeiros anos: a década dos 80 y llueu va haber una espicha a un preciu de 25 € y una jam session.
L’accesu a l’alderique tien entrada llibre y nél van participar cinco homes veteranos de la escena folk d’Asturies: Milio’l del Nido (Los Urogallos), Lisardo Lombardía (FonoAstur, Fundación Belenos, ex director del Festival Interceltique de Lorient), Frankie Delgado (Beleño y chigre Ca Beleño) y Fonsu Mielgo (Llan de Cubel), con moderación d’Iván de Cazarón. Pa la espicha y jam session de dempués ye necesario acutar la plaza de 25 € por persona a traviés del corréu noiteceltaporcia@gmail.com o pel Instagram o Facebook del festival.
Esta xornada améstase a la del sábadu 30 na que, dende les 21h, va haber un taller de baille tradicional al que van siguir les actuaciones del grupu folclóricu El Cabazo d’A Caridá; Ca Beleño, grupu homenaxe a la banda pionera del folk celta asturianu Beleño; de la veterana formación folk Corquiéu; de los escoceses Rura; y de La Güeriata DJ con una sesión de músiques de raigañu y electrónica de distintes partes del mundu. Los conciertos son de baldre y tamién va haber sardinada gratuita pa tola xente que s’avere hasta’l festival celta que más años lleva faciéndose ininterrumpidamente n’Asturies.
Semeya de l’actuación de Llan de Cubel en 2024, cedida por Iris Díaz Trancho.
Suscríbite a les nuestres novedaes
