La gaitera y intérprete de canción asturiana Ana Belén Antón (Mieres del Camín, 1978) -integrante del dúu d’asturianada contemporánea Antón Menchaca– ta acabante de participar nes Trobades ARIN (Artistas Invitadxs), una iniciativa d’intercambios artísticos y de convivencia cultural col colectivu Agitació Cultural Menorca. Antón foi convidada a amosar la so visión de la tonada asturiana y aldericar sobre’l llugar de la tradición na música d’anguaño.
Na primer xornada, celebrada’l xueves 12 de setiembre nel Centre Artesanal de Menorca, n’Es Mercadal. Belén Antón preparó una charra-conciertu de canción tradicional asturiana na que, amás d’interpretar delles asturianaes, amosó dellos aspectos del xéneru -ente ellos, por exemplu, les lletres en llingua asturiana- énte un públicu diversu nel que s’alcontraben, amás de población llocal, xente asturiano -d’Ayer, Llangréu y Xixón- que vive ellí. «Tuve que desplica-yos munches coses de la nuestra cultura, non solo cantar, sinón describir el significáu de les canciones, los intérpretes de canción asturiana, pone-yos música tradicional acompañada de gaita, versiones pa que conocieren el purismu d’Asturies…», recuerda la intérprete.
Mahó esfrutó de la segunda intervención d’Antón nestos alcuentros na tarde d’ayer, llunes 16, nuna mesa redonda baxo’l títulu «La Tradición en la creación musical actual» que compartió con delles artistes de la islla. L’alderique desendolcóse al rodiu de les modes, influencies y estremaes representaciones de la tradición al traviés de les époques. Faló de músicos clásicos y actuales como Anabel Santiago y Rodrigo Cuevas, y de l’apoyu d’Hevia a la canción asturiana gracies a la so collaboración con Mariluz Cristóbal Caunedo y Ismael Tomás Montes. La cantadora pudo deprender tamién de la cultura menorquina: «Saqué les mios propies conclusiones. Equí tienen tamién una especie de cantar que tán entamando a cuidar, que ye la glosa. Tien un raigañu mui fuerte na casa como pasa n’Asturies cola asturiada. Foi un descubrimientu pa min».
Suscríbite a les nuestres novedaes
