L’Edificiu Históricu de la Universidá d’Uviéu va ser l’escenariu ente’l martes 4 y el vienres 7 de febreru del Congresu Mundial de Cultura Asturiana, una iniciativa qu’entama l’Academia de la Llingua Asturiana cola collaboración de la propia Universidá d’Uviéu y el Gobiernu d’Asturies. La música asturiana va tar presente nesti alcuentru d’investigación y divulgación en, pelo menos, seis ponencies. La inscripción pa toles persones que quieran asistir yá ta abierta nesti enllaz.
Mientres cuatro díes, esta iniciativa va acoyer más de sesenta ponencies n’asturianu, gallego-asturianu, castellán y inglés al rodiu la cultura asturiana dende una perspeutiva interdisciplinar: «dende l’antropoloxía a les demás ciencies y estudios sociales», como recueye la web del congresu. Héctor Braga Corral, Pedro Pangua Rivas, Claudia González Rodríguez, Nacho Fonseca Alonso, Llorián García Flórez, Ramsés Ilesies y Xosé Antón Fernández Martínez van esponer les sos investigaciones sobre’l cantar tradicional, el papel de la gaita na cultura’l país, el pianu n’asturianada de Baldomero Fernández, la mitoloxía y la música na educación, el fenómenu de les nueches en danza y les acciones del Archivu de la Tradición Oral d’Ambás, respeutivamente.
El CMCA25 quier ser, según l’ALLA, «un foru au converxer dende les metodoloxíes, visiones y problemátiques más actuales: alredor de la minorización cultural y llingüística; de les periferies del primer mundu nel contestu global; del desaniciu y la resistencia cultural». A la fin, una cita imprescindible pa les persones interesaes nel estudiu de la cultura d’Asturies y, nesi sen, na investigación de les perspectives pasaes, presentes y futures del territoriu. El programa completu puede consultase equí.
Suscríbite a les nuestres novedaes
