Convocatoria por Asturies va llevar a la Xunta Xeneral una PNL pa incluyir la música tradicional nel currículum educativu

La conceyala d’Izquierda Xunida-Mas País-IAS nel Ayuntamientu de Xixón, Noelia Ordieres, y el diputáu y voceru del Grupu Parlamentariu Convocatoria por Asturies IX- Mas País-IAS na Xunta Xeneral, Xabel Vegas, presentaron esta mañana en rueda de prensa nel Ayuntamientu de Xixón una Proposición Non de Llei a la Mesa de la Xunta Xeneral pa incluyir la música tradicional asturiana nos currículos educativos d’Educación Infantil, Primaria y Secundaria Obligatoria.

Esta proposición insta al Gobiernu d’Asturies a facer una revisión de los currículos pa «garantizar que’l conocimientu, la práctica y la valoración de la música tradicional» aporte a toles etapes educatives; diseñar y implementar estratexes de formación pa cualificar al profesoráu nesti sen; fomentar la collaboración coles asociaciones, coleutivos y persones espertes nel ámbitu pa desendolcar mesmo materiales pedagóxicos qu’actividaes complementaries y estraescolares; y, amás, evaluar periódicamente l’impautu d’estes midíes.

Convocatoria por Asturies espón qu’anguaño «el conocimientu y la práctica de la música tradicional asturiana tán en riesgu de dilise ente les nueves xeneraciones». Amás, destaquen que la so falta de protagonismu supón «una oportunidá perdida pa incorporar un conteníu que podría arriquecer la esperiencia educativa y fomentar una querencia más fonda pol nuestru patrimoniu cultural».

Puxu dende Xixón
Noelia Ordieres, pel so llau, reivindica’l llabor del so grupu municipal nel Conceyu de Xixón, que vienen apurriendo delles iniciatives pa «dar impulsu, sofitu y prestixu» al patrimoniu cultural asturianu. «Nesi sen, nel plenu pasáu refugóse una iniciativa que plantegaba una ferramienta que defendía dar impulsu a la música tradicional y tolo que l’arrodia, una escuela de música tradicional en Xixón», recuerda. Poro, emburrien agora con esta propuesta pa que seya la Xunta Xeneral quien s’ocupe de la cuestión, col enfotu de cumplir la necesidá de que se-y dea «la mesma importancia al nuesu patrimoniu que se-y da a otros estilos musicales y con ello promover la conocencia, l’arguyu y la hestoria de la nuesa tierra. Too ello faise cola apuesta dende lo público, dende’l patromoniu común», apunta.