El 4 de xunu va celebrase la segunda edición de los Premios de l’Academia de la Música d’España, el certame más grande d’esti calter nel ámbitu estatal. Rodrigo Cuevas va ser el presentador de la gala xunto a l’andaluza Maria Pelaé nun eventu que va desendolcase nel IFEMA de Madrid y emitise en directo a les 22h per La 2, RTVE Play y YouTube.
Amás de la presentar la gala, l’axitador folclóricu ta nomináu por La Romería como Meyor Xira del añu per segunda vegada nestos premios. Rodrigo Cuevas, dempués de cuasi dos años de conciertos dientro y fuera de la Península, con paraes en México, Chile, Colombia, Portugal, Francia y Suiza, zarró la xira na sala Razzmatazz de Barcelona el mes pasáu, con 117 actuaciones al costazu.
El músicu comparte nominación con otros artistes del Estáu como Coque Malla, Estopa, Ana Mena, Arde Bogotá, Carlos Ares y Israel Fernández. D’esta manera, l’Academia de la Música reconoz el llabor d’un equipu pergrande de músicos, baillarines, técnicos, producción, vestuariu, maquillaxe y más que ficieron posible xunto al artista una romería qu’escosó y conquistó espacios pente la música asturiana.
Per otru llau, el so cantar conxuntu col dúu gallegu Caamaño&Ameixeiras ‘Catro Cousas‘ tamién ta nominada na categoría a «Mejor Canción en Gallego/Asturiano/Bable». Esta estaya de los Premios de l’Academia de la Música, como amuesen mesmo’l so nome como la llista de nominaciones, entá sigue discriminando la llingua asturiana, nun respetando la nomenclatura institucional nin reconociendo la bayura de cantares escritos y espublizaos nesti últimu añu n’asturianu y gallego-asturianu.
Suscríbite a les nuestres novedaes
