Con Rodrigo Cuevas enxamás s’acaben les sorpreses. Hai milenta exemplos de la trescendencia y popularidá del axitador folclóricu dientro y fuera d’Asturies y esti sábadu hubo una amuesa amás. Nel marcu del 56 Descensu Folclóricu del Nalón hubo dos peñes que s’inspiraron en Rodrigo Cuevas pa facer la so embarcación: El Bajo y La Trapia. Amás, la primera d’elles foi premiada.
La peña d’El Bajo desfiló con un Rodrigo Cuevas enorme, vistíu cola montera picona y el xilecu ensin camisa que-y dio la popularidá n’Asturies hai una década. Diba amás montáu enriba d’un gochu con gafes de sol que, anque nun facía nenguna mención esplícita, recordaba enforma al gochu del logotipu de Los Berrones. La identidá del país tamién taba taba presente nesta embarcación cola inclusión d’unes gaites, una botella sidra y una casa asturiana. Too esto fizo qu’El Bajo quedaren segundos na clasificación xeneral y algamaren el primer premiu d’Asturianía, distinción donada pola empresa cultural A Mansalva.
D’otra banda, la peña La Trapiá foi vistía col traxe col que l’axitador folclóricu revolucionó la escena asturiana y que vistió nel videoclip ‘Ritmu de Verdiciu’ o na campaña publicitaria de Sidra d’Asturies DOP. Esta embarcación, muncho más pequeña y modesta y que tenía por nome Romería de Manual -n’homenaxe al discu Manual de Romería de Rodrigo Cuevas-, tenía un ramu como elementu central y nella nun faltaba reivindicación: había una bandera de Palestina, una de «Salvemos Peñamayor» y les monteres de los y les peñistes tamién llevaben una pegatina solidaria col pueblu palestinu.
El propiu artista y la so axencia de contratación, El Cohete Internacional agradecieron a traviés de les sos redes sociales qu’estes dos peñes s’inspiraren nel axitador folclóricu.
Per otru llau, el festival Regodón Llaviana, nel que la música n’asturianu sonó con Los Gasgones, Los Berrones y Vicente Díaz, foi tou un éxitu. «Pasaron alredor de 30.000 persones en cuatro díes; funcionó tola programación mui bien, con un llenazu n’actuaciones como les de Los Berrones; la entrega de premios tuvo perbién; Vicente Díaz arrastró una pila xente de la so edá… asina que tamos mui contentos», valora Pablo Carrera d’A Mansalva, ún de los organizadores d’esti festival qu’acompaña a la Fiesta d’Interés Turísticu del Descensu Folclóricu del Nalón.
Suscríbite a les nuestres novedaes
