El xunu pasáu celebróse en Xixón la I Batalla de Canciones n’Asturianu, concursu qu’axuntó a dellos solistes de rap y spoken word col requisitu de que fueren xente mozo y interpretaren les sos lletres nesti idioma. Ente los proyectos participantes, rescampló’l de DJPaulo14 pol so nivel llingüísticu y porque yera ún de los que tenía temes n’asturianu asoleyaos en YouTube. ‘Cabranes ye lluz y bruma’, ‘Conceyos d’Asturies: ñeve y fueu’ y ‘Nesi silenciu’ son los cantares qu’esti autodefiníu «poeta urbanu» xixonés de 20 años llanzó nesti tiempu. A ellos súmase agora ‘Sueve’, publicáu hai unos díes. Falamos con él pa conocer más sobre’l surdimientu y próximos pasos d’un nome nuevu -y bien mozu- de la escena de música n’asturianu y del hip hop n’Asturies.
¿Quién ye DJPaulo14 y cuándo, cómo y por qué entamasti a facer música?
Soi Pablo González, nací en xunu del 2005 en Xixón, magar que DJP14 se tien por compositor cabranés, pol conceyu de Cabranes, onde conocí los mios momentos más felices. Con DJP14, entamé na música rap con 12 años, pero nel institutu atopéme con una profunda conexón cola poesía y la lliteratura.
«Soi un poeta urbanu porque nes mios lletres la poesía y el hip hop únense como pensamientu, faciendo de la cai un espaciu filosóficu onde la verdá tómase forma de versu»
¿Cómo describiríes el to estilu de rap?
Ye una combinación de hiphop melódicu de boom bap clásicu, xunto a lletres profundes y filosófiques, inspiráu en poetes y escritores como Miguel Hernández o Pablo Neruda. La mio música ta destinada a facer lletres al rodiu la mio vida, la oficialidá de la llingua asturiana y l’amor pola mio tierra.
Polo que comentes, les lletres tienen munchu pesu na to propuesta y mesmamente defíneste como “poeta urbano”. ¿Qué papel xueguen los testos na to propuesta y qué busques tresmitir con elles?
Defínome como un poeta urbanu porque la mio voz naz ente les cais, ente’l formigón y la xente, tresformando la vida diaria n’arte. Nun escribo namás pa dexar guapura, sinón pa espresar lo que siento y lo que veo, col enfotu de dar verdá a lo que munchos callen. La mio poesía axunta la crudeza de la realidá cola sensibilidá d’un artista, amestando ritmos de rap, reflexón y filosofía. Un poeta urbanu ye un creador que lleva la cultura, la memoria de la cai y la emoción de la xente al papel y a la voz, polo tanto soi un poeta urbanu porque nes mios lletres la poesía y el hip hop únense como pensamientu, faciendo de la cai un espaciu filosóficu onde la verdá tómase forma de versu.
«Decatéme de que tengo que lluchar pola mio cultura, pola mio historia, y, sobre manera, sentime cómodu escribiendo, ensin importar les crítiques»
Entamasti asoleyando temes en castellanu pero los últimos son toos n’ast. ¿Por qué esti xiru llingüísticu?
Yo siempre escribí en dambes llingües, asturianu y castellanu, porque siento que les dos formen parte de lo que soi. Pero, pa responder a esta entruga, tengo que remontame a los mios primeros años nel institutu. Daquella, la llingua que más usaba yera l’asturianu, y munchos mayestros y mayestres machacábenme con esi estigma horrorosu de que l’asturianu ye de pueblerinos y que naide trunfa con esta llingua. Esa manera de machacame cada vegada que me comunicaba n’asturianu fixo qu’entamara a escribir los mios primeros temes en castellán.
Siendo más adultu decatéme de que tengo que lluchar pola mio cultura, pola mio historia, y, sobre manera, sentime cómodu escribiendo, ensin importar les crítiques. Hai quien me diz que seya realista, que n’asturianu nun se consigue nada. Entós, yo siempre retruco que Cervantes enxamás pensó qu’El Quixote llegaría a tar tornáu al rusu, y güei ta. Na vida siempres hai que sentise cómodu y lluchar polos tos suaños.
Participasti na I Batalla de Canciones n’asturianu. ¿Qué tal la esperiencia y cómo valores la iniciativa?
Prestóme muncho poder compartir lo que siento y lo qu’escribo na mio llingua. Paez mentira, pero non en toles plataformes de música hai un espaciu pal asturianu. Ye por ello que valoro muncho cuando les organizaciones dan voz al pueblu. La iniciativa foi maraviyosa, cuasi tanto como los artistes que topé ellí. Nun pueo dicir con pallabres lo que siento al tar delantre’l públicu; ye un amiestu de nervios y felicidá. De verdá, cuéstame respondete esta entruga. La esperiencia foi perguapa; namás pueo dar les gracies a tolos que dais voz a esta llingua y a tolos que la falamos.
«La I Batalla de Canciones n’Asturianu foi la primer vegada que xubí a un escenariu y espero poder volver a compartir la mio música en directo»
¿Foi esta la primer vez que xubisti a un escenariu? ¿Va haber más oportunidaes de vete en directo?
Foi la primer vegada que xubí a un escenariu y espero poder volver a compartir la mio música en directo.
Yá toi tratando d’ameyorar la performance y taré encantáu de siguir representando l’asturianu, esperando siguir medrando.
¿Qué oxetivos tienes como artista y cuáles son los tos planes próximos?
Ye una bona entruga. Los mios oxetivos nun son mui ambiciosos. Creo que por agora trataré de siguir medrando, tresmitiendo la mio llingua, los mios sentimientos y los mios raigaños. Nunca fixi esto por siguidores, sinón porque ye lo que de verdá m’apasiona. Bono, y a decir verdá, prestaríame muncho tamién siguir creciendo nel mundu del rap competitivu, el freestyle, y espero que nun futuru podamos dicir que por fin tenemos batalles de freestyle n’asturianu.
«Quiciabes el rap nun ye’l xéneru músical más importante d’Asturies, pero eso nun significa que nun tengamos cultura hip hop; tolo contrario: Asturies, güei día, gocia de munchos freestylers mui bonos»
Por último, ¿cómo ves la salú del rap n’Asturies? ¿Y del rap n’asturianu? ¿Por qué crees qu’hai menos bandes n’ast nesti estilu que notros xéneros musicales?
Quiciabes el rap nun ye’l xéneru músical más importante d’Asturies, pero eso nun significa que nun tengamos cultura hip hop; tolo contrario: Asturies, güei día, gocia de munchos freestylers mui bonos. El rap na tierrina, a mio parecer, naz un poco del rock, y tuvimos raperos y grupos mui buenos como Dark la eMe, Arma X o Doris Escarlata; raperos increyibles, de los que toi seguru que si nacieren fuera d’Asturies, seríen munchu más reconocíos pola industria.
Na actualidá, nun soi’l únicu raperu, nin muncho menos. Hai munchos que, baxo escases cifres, mueven lletres enormes enllenes d’emoción, como’l maraviyosu grupu Souls in Pain, del que conocí a ún de los sos integrantes na I Batalla de Canciones n’asturianu. Ellos son un exemplu de un rap increyible y activu.
Creo que tolos raperos que mencioné cantaron n’asturianu dalguna vegada, pero pesie a que’l rap n’asturianu ye más escasu, sería imposible dicir que’l hip hop y el so rap tán muertos n’Asturies; porque mientres siga habiendo mentes abiertes, el rap enxamás va morrer.
Suscríbite a les nuestres novedaes
