Anque se roblara un alcuerdu de paz, les bombes siguen tovía güei cayendo en Gaza, causen muertos y Israel caltién la so política d’apartheid. Al empar, siguen les muestres de solidaridá col pueblu palestinu y esti sábadu 25 La Pola Llaviana va acoyer una mui especial: el conciertu 12 horas de música para que no se oigan las bombas. Nesti actu entamáu pola Asociación de Autónomos de Llaviana (AULAV) van participar ventiún artistes de los que diez tán venceyaos a la música n’asturianu.
Ambás y Ramsés, Guieldu, Rellume, Rollu Folk, Ún de Grao, Nuberu, Rodrigo Cuevas, Xuacu Amieva, Tante y la Stroza y Dixebra, son los proyectos que faen música n’asturianu que van tocar ente les doce la mañana y la medianueche nel Parque de los Príncipes de La Pola. Xunto a ellos van tar tamién Sacavera, Silvidos y Gemidos, Lucía Alonso y Rodrigo Sturm, Silvia Joyanes, Eskalón, Muzakeros, Fe de Ratas, Kordinaos, Fusión Light, Perro Blanco Blues y Trujas. Nel eventu -que cunta col sofitu del Ayuntamientu de Llaviana- va haber una carpa con barra, comida, huches solidaries y una cesta sortéu y tola recaudación va donase a la ONG Médicos Sin Fronteras.
Esti ye’l tercer conciertu solidariu con Palestina que se celebra n’Asturies dende qu’entamaron los últimos ataques d’Israel escontra la Franxa de Gaza a finales de 2023 y que causaron más de 67.000 muertos -más de 20.000 d’ellos neñes y neños-, milenta desapaiciones y l’éxodu d’una montonera xente. El primeru d’ellos celebróse en marzu de 2024 en Mieres, el segundu‘l pasáu 9 d’abril n’Uviéu y el d’esti sábadu 25 va ser una nueva amuesa del compromisu de la escena sonora del país col fin del xenocidiu.
Suscríbite a les nuestres novedaes
