Tres d’asoleyar el mayu pasáu l’adelantu de ‘Escuela Asturiana‘, Skama la Rede vuelven a dar novedaes al rodiu’l so próximu trabayu. Esti vienres 24 a les diez de la mañana estrenen na canal de YouTube de musicasturiana.com un nuevu adelantu: ‘Al debalu‘. Esti cantar va formar parte del quintu discu de la formación ska-punk y preséntase como cenciellu con un videoclip realizáu por Titi Muñoz. Nes redes sociales del grupu yá pue vese teaser de la obra audiovisual.
Enantes qu’acabe l’añu va ver la lluz el trabayu col que Skama la Rede festexen más de venti años de carrera. L’álbum va incluyir cantares nuevos y una actualización de les canciones del 2019 que grabaron pero nun s’enxertaron en nengún discu físcu. Pa ello, dalgunes de les voces más conocíes de la escena asturiana collaboraron na grabación.
La música va publicase en vinilu y va dir acompañada d’un llibru que contién una esbilla de semeyes, entraes, carteles y recortes de prensa -sobremanera de la dómina primera de Skama La Rede-, amás de testos de xente cercano a la banda.
Suscríbite a les nuestres novedaes
