Yá pue vese na canal de YouTube de musicasturiana.com lo nuevo de Skama la Rede, ‘Al debalu’. La banda de rock astur torna colo que Miguel Fernandi «Burilo», vocalista del grupu, presenta como «un cantar que fala de la xente que se xuega la vida na mar fuxendo del so país y a la busca d’una vida meyor». Musicalmente entemez el so característicu punk-ska «con una parte más hardcore onde pon voz Pirri d’Escuela de Odio«.
‘Al debalu’ ye’l segundu adelantu del próximu discu d’esta banda, depués d’asoleyar el mayu pasáu el cenciellu ‘Escuela Asturiana‘. El cantar pel momentu namás ta publicáu en formatu audiovisual; un formatu pol qu’apostaron por estes razones que da «Burilo»: Teníemos muncha gana de trabayar col realizador Titi Muñoz y viendo’l resultáu del videu supimos esplicamos y él entendenos».
«Y por fin el discu ta pa salir depués de más retrasos de los previstos y van llegar de la fábrica d’equí a poco los vinilos y los llibros con un diseñu espectacular d’Alfonso Zapico”, añade’l cantante de Skama la Rede al rodiu d’esti esperáu trabayu col que’l grupu festexa más de venti años de carrera.
L’álbum va incluyir cantares nuevos y una actualización de les canciones del 2019 que grabaron pero nun s’enxertaron en nengún discu físcu. Pa ello, dalgunes de les voces más conocíes de la escena asturiana collaboraron na grabación. La música va publicase en vinilu y va dir acompañada d’un llibru que contién una esbilla de semeyes, entraes, carteles y recortes de prensa -sobremanera de la dómina primera de Skama La Rede-, amás de testos de xente cercano a la banda.
Suscríbite a les nuestres novedaes
