En 2022 nel tránsitu de les ballenes de Cimavilla inaugurábase una escultura n’alcordanza de Manolo Carrizo, artista de pop llariegu y compositor d’himnos como ‘Pescadores‘ y ‘Gijón, la maravilla‘. En marzu d’esti añu La Calzada estrenaba un monolitu n’homenaxe a Xulio Ramos, ún de los primeros integrantes del Nuevu Canciu Astur. El mes pasáu, n’El Natahoyo poníase-y a un xardín el nome de Mariano Castro, fundador de l’agrupación folclórica Los Xustos. Y agora, vecinos d’El Cerilleru entamen una iniciativa pa reconocer a Roberto González y Margarita Rodríguez, fundadores del colectivu folclóricu Los Collacios.
Gracies a estes iniciatives que surdieron per parte de la ciudadanía playa y que’l Conceyu sofitó, Xixón aumenta’l reconocimientu a artistes y agrupaciones venceyaes a la música asturiana. La última en ponese en marcha anuncióse estos díes y ye’l llamamientu que Magali, fía de Roberto González y Margarita Rodríguez, fixo pa homenaxear a los fundadores de Los Collacios cola colocación d’una placa allugada na plaza Fernando VI d’El Cerilleru. El vecindariu ta recoyendo firmes pa que seya una realidá y asociaciones de vecinos como les de La Calzada, L’Arena y Xove dieron tamién el so sofitu a la propuesta.
Semeya del actu d’inauguración del xardín Mariano Castro de Los Xustos, esbillada del grupu de Facebook Los Xustos 60/70.
Suscríbite a les nuestres novedaes
