Musicasturiana.com incorpora ocho referencies nueves al so catálogu de más de 500 productos

Yá hai nuevos CDs, vinilos y llibros a la venta na tienda de Musicasturiana.com, el mayor catálogu de música n’asturianu que suma agora más de 500 referencies disponibles. Les incorporaciones son el discu en solitario de Rubén Bada; vinilos de Manolo Quirós, Orquestina Son Les Poles y Carlos Rubiera; CDs de Nuberu, Fardaxu y Darbukka; y un llibru de Xuacu Amieva.

El discu homónimu de Rubén Bada ye un trabayu dividíu en tres partes: ‘Cantares’, ‘Vigulín’ y ‘Guitarra’. ‘Guitarra’ tien seis cortes con pieces interpretaos en xéneru instrumental, emplegando’l so estilu de ‘fingerpicking’ col que ya venía trabayando n’otros tantos proyectos. ‘Vigulín’ son cuatro cortes nos qu’ufierta pieces mui lligaes a la tradición del baille: xotes, muñeres, agarraos, etc., dalgunes tradicionales, otros de composición propia. ‘Cantares’ ye la parte dedicada a les coples y les melodíes tradicionales y populares, de chigre, pal baille, de tonada… Les igues d’estos temes amuesen la visión más personal del músicu sobre estos repertorios.

Col recién pieslle de la tienda de discos xixonesa Mundo Sonoro, Musicasturiana.com incorporó al so catálogu dalgún de los vinilos que taben ellí a la venta. Concretamente suma trés vinilos publicaos nos años 80 pola Sociedad Fonográfica Asturiana: El Indiano, II y Mariñanes. El Indiano d’Orquestina Son Les Poles ye un LP llanzáu en 1986 por esti dúu que formaben los reputaos músicos Pedro Bastarrica y René de Coupaud. Nesti trabayu amesten temes de calter popular con sintetizadores, siendo una obra pionera nel so tiempu. II ye’l vinilu qu’en 1988 publicó’l renovador de la gaita asturiana Manolo Quirós. Mariñanes ye un discu de Carlos Rubiera asoleyáu en 1988 qu’inclúi gran himnu d’esti intérprete del Nuevu Canciu Astur: ‘La Capitana’

Amás d’esta novedá y estes ayalgues, tamién s’incorpora al catálogu d’esta tienda el discu El árbol de Navidá qu’inclúi varios cantares populares de la mítica formación Nuberu; el CD Celta Argentino de Fardaxu, grupu folk formáu n’Arxentina por descendientes d’asturianos; Sete Sones de Darbukka, formación de música folk del Navia-Eo que cantaba en gallego-asturianu; y el métodu d’enseñanza interactivu que tien CD La gaita asturiana del mayestru Xuacu Amieva.