Esta selmana Radio3 anunciaba un conciertu especial pa festexar el 30 aniversariu de la reinauguración del Teatru Xovellanos de Xixón. El cartelu ta formáu por seis artistes -trés d’ellos rellacionaos cola música n’asturianu- de los que namás una ye una muyer: Lorena Álvarez. Nacho Vegas, Rodrigo Cuevas, Ferla Megía, From y Puño y Dragón completen esti eventu que ta siendo cuestionáu pola falta d’igualdá de xéneru. Tres d’una denuncia fecha esta mesma mañana pola propia Lorena Álvarez, l’asociación MIM (Mujeres de la Industria Musical) ta acabante de publicar un comunicáu desixendo paridá.
Nel so comunicáu, MIM manifesta la so «profunda indignación pola programación» y considera «inaceptable qu’un eventu financiáu con fondos públicos y promovíu por una radio pública nun garantice un mínimu d’igualdá de xéneru na so programación». «La música y la cultura deben reflexar la igualdá particularmente n’espacios públicos y con visibilidá institucional», sorrayen dende MIN, qu’esixen a les instituciones públiques «que cumplan cola Llei d’Igualdá y qu’integren, de manera tresversal, criterios de paridá nes sos contrataciones culturales«.
D’esta manera, faen un llamamientu a los organizadores a que «revisen el cartelu y adopten midíes inmediates pa garantizar la paridá» y tamién a «los artistes homes pa que respalden esta denuncia y adopten decisiones que contribuyan a esixir una programación xusta». Nel momentu de la publicación d’esta noticia, Rodrigo Cuevas, Ferla Megía, Nacho Vegas y From yá fixeron publicaciones nes sos redes sociales sofitando les pallabres de Lorena Álvarez y MIM.
Suscríbite a les nuestres novedaes
