Asturies va ser el país convidáu na edición del 2027 del Showcase Scotland, el principal alcuentru profesional de música folk y de raíz que se celebra añalmente na ciudá escocesa dientro del prestixosu festival Celtic Connections, una de les grandes cites internacionales de la música celta.
L’asistencia d’Asturies como país convidáu va suponer una presencia institucional reforciada, con estand propiu, la participación de seis grupos nel Showcase del festival y la presentación de les promotores musicales asturianes na muestra profesional, amás d’una presencia destacada dientro de l’amplia programación que dinamiza la vida cultural escocesa con cientos de conciertos mientres la celebración del alcuentru.
D’esta manera, Asturies recueye’l testigu de Québec como nación convidada. Amás, la programación como país convidáu fai posible tamién la distribución de material informativu y promocional sobre’l trabayu de los promotores, festivales y artistes asturianos na presentación principal del eventu, un espaciu d’especial relevancia pal espardimientu de proyectos, circuitos y polítiques culturales énte profesionales del sector de tol mundu.
El festival celébrase en Glasgow, reconocida pola UNESCO como Ciudá de la Música, un distintivu que respuende al so compromisu cola creación, la diversidá cultural y la protección del patrimoniu musical como elementu central de progresu y dinamismu. El Celtic Connections axunta cada añu a más de 1.000 artistes nuna programación que s’estiende a lo llargo de cientos d’actividaes y qu’atrái de forma sostenida a más de 100.000 espectadores. Nesti 2026, Rubén Bada y Pepín de Muñalén fueron los artistes asturianos d’esti eventu.
Suscríbite a les nuestres novedaes
