El 6 y 7 de mayu va celebrase la cuarta edición del Congresu Internacional SAnTINA, que va tener llugar de manera virtual y que ta promovida pola Oklahoma State University, University of California-Riverside, Universitatea Ștefan cel Mare de Suceava, la Universidade de Vigo y la Sociedá pal Análisis de Temes Culturales y Identidaes Llingüístiques n’Asturies (SAnTINA). Hasta’l día 15 de marzu van poder unviase propuestes pa participar nesti congresu que pueden abarcar temátiques rellacionaes cola música asturiana, amás de con otres como la llingua, lliteratura y llingüística asturiana; historia, activismu y migraciones; cine y artes visuales; y deportes, industria, salú y mediu ambiente.
Quien quiera tener opción a participar nesti IV Congresu Internacional SAnTINA tien qu’unviar a traviés d’esti formulariu el resume colos oxetivos, metodoloxía y referencies bibliográfiques. Esti congresu va incluyir secciones temátiques; conferencia plenaria; presentaciones de llibros y proyectos d’investigación; les meses redondes Linguistics 4.0: How AI is transforming the study of language; Humanidades médicas y lenguas minorizadas; Amigos/as de los estudios asturianos; y el premiu Ana Cano.
La Sociedá pal Análisis de Temes Culturales y Identidaes Llingüístiques n’Asturies ye una rede d’académicos y creadores culturales con sede n’Estaos Xuníos que se llanzó en 2021 cola I Converencia SAnTINA p’aumentar la visibilidá internacional de los Estudios Asturianos, promoviendo al empar el desarrollu de proyectos collaborativos. Ente los sos oxetivos tán los de «fomentar un espaciu pa la investigación, enseñanza y difusión de la llingua y cultura asturianes a nivel internacional, amás de factiliar el diálogu ente asturianos y académicos asturianos, tanto n’Asturies como na diáspora».
Suscríbite a les nuestres novedaes
