La XIV edición del Concursu de Canción Asturiana Conceyu de Siero aporta a les finales. Esti domingu 12 d’abril a les 11.30h el Teatru Auditoriu de La Pola (Siero) acueye la primer final na que van competir siete de los catorce finalistes clasificaos pa ún de los eventos institucionales más veteranos dedicaos a l’asturianada.
Les y los cantadores que participen esti domingu en La Pola son: María Latores (Uviéu), Ricardo Balmori Suero (Cabrales), Claudia Abad Bertólez (Llanes), Raúl Díaz García (Samartín del Rei Aurelio), María Luisa Martínez Suárez (Xixón), Fernando Entrialgo Vega (Xixón) y Cristina Sánchez Sánchez (El Valle Baju de Peñamellera). Amás Maribel Morán y Rubén Álvarez González compiten na modalidá de canción dialogada y Mario González García y Rubén Álvarez González na categoría moza. Por ver primera, van interpretar una canción ensin microfonía.
El gaiteru oficial ye Valentín Fuente y el presentador ye Miguel Ánxel Montenegro. Esti certame ta entamáu por AFATRA (Asociación de Folclore Amigos de la Tradición) col sofitu del Ayuntamientu de Siero y va celebrase hasta’l 19 d’abril tolos domingos nel Teatru Auditoriu de La Pola. El 10 de mayu va ser la gala de premios d’esti concursu que ye clasificatoriu pal Premiu Nacional Obdulia Álvarez «La Busdonga» d’Asturianada.
Suscríbite a les nuestres novedaes
