La mestura ente música electrónica y asturiana ta dando una bona collecha y el pasáu 27 de marzu los Kuivi Almacenes d’Uviéu foron testigu de cómo ta xorreciendo esta escena. Yera un doble estrenu: el primer conciertu de Tasio, un proyectu creáu l’añu pasáu qu’entemez soníos como’l dubstep, drum&bass, rap o spoken word con asturianada y otres músiques de raigañu; y la presentación del so primer álbum, Clá 83, un trabayu que tamién pue mercase yá en musicasturiana.com.
«Hai más xente de la qu’esperaba y el sitiu mola más de lo que pensaba», bromió Dudu García, alter ego de Tasio, enriba l’escenariu. Precisamente, el desenfadu y la cercanía col públicu marcó’l tonu d’un show que tuvo estructuráu en delles partes: primero lo más tradi, llueu les collaboraciones, y llueu lo más electrónico.
Asina ye como temes más conocíos como’l que foi el so primer cenciellu, ‘Tener praos‘, o ‘La seca‘ -del qu’asoleyó un videoclip- abrieron un conciertu que remató con otros como’l spoken word ‘Xixón 1926‘ -pal que tuvo unes pallabres faciendo mención a El Velcro, l’otru proyectu que tien d’esti xéneru xunto a Pablo X. Suárez- o ‘Tornó‘, influenciáu pol pop y el drum&bass.
Tamién hubo sorpreses, y ye que les collaboraciones d’Alba Menéndez y Andrés Rodrigues nun sonaron namás nos cantares nos qu’andechen nel discu –‘Cantar del alba’ y ‘Djembe revenge’-, sinón que caún d’estos músicos interpretó con Tasio otru tema. Xunto a la cantante y panderetera ficieron una versión dubstep de la popular asturianada ‘Ayer vite na fonte’, mientres que’l gaiteru y productor puso son a una llarga tonada esperimental que Tasio cantó énte una iluminación qu’acompañó con xeitu al espectáculu.
Satisfechu col resultáu del conciertu y col proyectu nuevu de quien lleva 20 años trabayando cola música asturiana y la electrónica por separáu, Tasio despidióse pinchando un remix de ‘Cantar del ayerán que perdió la guerra’ de Llan de Cubel, tou un hit de la música’l país que Dudu García quixo reivindicar dexando claro dos de los pegoyos que dan identidá a esti proyectu –tradición y electrónica- xunto a los otros dos: crítica social con ironía y desendafu, como se vio esi vienres nos Kuivi Almacenes d’Uviéu y va poder sentise nos próximos conciertos que dea esti nome nuevu de la electrónica de raigañu.
Suscríbite a les nuestres novedaes
