La presentación del Anuariu de la Música Asturiana 2025 inaugura esti xueves los XIV Alcuentros de Músiques Asturianes

Esti xueves 21 de mayu a les 19.30h entama la decimocuarta edición de los Alcuentros de Músiques Asturianes qu’entama la Fundación Municipal de Cultura, Educación y Universidá Popular de Xixón y el Serviciu de Normalización Llingüística nel Conceyu. La primer de les actividaes va ser la presentación del Anuariu de la Música Asturiana 2025, que va cuntar cola participación del so director, Xune Elipe, y de Xicu Ariza, redactor na publicación dende hai 16 años.

L’Anuariu de la Música Asturiana lleva más de 25 años publicándose ininterrumpidamente y ye un preséu fundamental de la escena del país. Nesta presentación, los mentaos Elipe y Ariza, van facer una audición comentada del discu que lu acompaña, nel que queda reflexáu la diversidá estilística y sonora de la música’l país. La cita va ser nel Patiu del Centru de Cultura Antiguu Institutu, con entrada de baldre y a es 19.30h, como les demás actividaes d’estos alcuentros, que van siguir con más cites qu’axunten tradición, esperimentación y nueves voces de la escena actual.

Asina ye como’l 28 de mayu ye’l turnu de Buir, un proyectu qu’axunta a trés figures esenciales de la música tradicional asturiana: Xosé Ambás, Vero Rubio y Pepín de Muñalén. Esti grupu representa la recuperación y reinterpretación del repertoriu tradicional, combinando voces, flauta y sonoridaes que conecten col patrimoniu musical d’Asturies, pero dende una visión actualizada y creativa. El 2 de xunu actúen Mapi Quintana y Marcos Baggiani, nuna propuesta que mezcla poesía, sensibilidá vocal y percusión contemporánea.

El 4 de xunu suben al escenariu Ún de Grao y Rodrigo Martínez. La so propuesta básase nel diálogu ente instrumentos tradicionales y arreglos contemporáneos, con un fondu que bebe de la música de raigañu asturianu pero que busca nueves formes d’espresión. El 9 de xunu ye’l momentu de Alicia Villanueva xunto a Carlos Velasco, que van llevar a escena l’asturianada, siendo dambos campeones del Premiu d’Asturianada Obdulia Álvarez «La Busdonga».

El ciclu despídese’l 12 de xunu cola propuesta A BAILLAR: Tarde en danza al mou Xixón, una xornada multidisciplinar que combina música y danza tradicional. Incluye un taller de baille a les 19:00 hores de Nel Villanueva acompañáu por Muyeres por Grau, siguíu del conciertu de Leirana (proyectu nuevu de Nel Villanueva) a les 20:00, y l’actuación final de María Trubia xunto a Pau Santirso a les 21:15.